Ўзбекистон Республикаси Президентининг иқтисодиёт соҳаларини ривожлантириш, инвестисия ва ташқи савдо сиёсатини амалга ошириш масалалари бўйича маслаҳатчиси ўринбосари Шуҳрат Холдорович Aтабаев акциядорлик тижорат Халқ банки Бошқаруви раиси этиб тайинланди. Шу пайтгача Бошқарув Раиси вазифасида ишлаган Фарҳод Саламов эса бошқа ишга ўтказилган.
Шуҳрат Aтабаев 1978 йилда туғилган. Дастлаб Тошкент молия институти, кейинчалик Япониянинг Сиёсий фанлар Миллий институти ҳамда Президент ҳузуридаги давлат ва жамият қурилиши академиясини тамомлаган.
Меҳнат фаолиятини 1995 йил Навоий вилоятидаги 14-ўрта мактабда инглиз тили ўқитувчилигидан бошлаган. 1998 йилдан бошлаб Тошкент давлат техника университети «Камолот» жамоат марказида бош ҳисобчи бўлиб фаолият юритган.
2001-2012 йилларда Ўзбекистон Марказий банкида турли лавозимларда меҳнат қилган. 2015-2017 йилларда AТ Халқ банки Бошқаруви Раиси ўринбосари, 2017-2018 йилларда Ўзбекистон Марказий банки Бошқаруви Раиси ўринбосари, 2018-2021 йилларда «Ипотека банк» AТБ Бошқаруви Раиси лавозимларида ишлаган. Жорий йил февраль ойидан буён эса Ўзбекистон Республикаси Президенти маслаҳатчиси ўринбосари вазифасида меҳнат қилиб келаётган эди.
