Аввал хабар қилганимиздек, бугун, 24 июль куни Ўзбекистон Республикаси Президенти Шавкат Мирзиёев ўзининг табаррук 64 ёшини қарши олди. Шу муносабат билан давлат раҳбарини унинг яқинлари табриклади.
"Таваллуд айёмингиз муборак бўлсин, азиз инсонларим. Аллоҳ Сизни паноҳида асрасин!" - дея пост қолдирган Президентнинг катта қизи, Масс-медиа фонди Васийлик кенгаши раиси ўринбосари Саида Мирзиёева отаси ва ўғлининг суратини илова қилган ҳолда.
Маълум бўлишича, бугун Саида Мирзиёеванинг кенжа фарзанди ҳам бир ёшни қарши олган. Бобосининг туғилган кунида дунёга келган фарзандга Шавкат деб исм қўйилган.
Давлат раҳбарини куёви, кичик қизи Шаҳноза Мирзиёеванинг турмуш ўртоғи Отабек Умаров ҳам самимий табриклаган.
"Азиз ва қадрли инсоним!
Яратганнинг Ўзи Сизнинг зиммангизга нечоғлик машаққатли юмушни юклаганини ҳаётимизнинг ҳар куни ва соатида кўриб, билиб турибмиз.
Сиз қийинчилик ва тўсиқлар қанчалик кўп бўлмасин, катта давонлардан ошиб, Халқимиз учун фаровон ҳаёт ва адолатли давр олиб келишингизга астойдил ишонамиз.
Набира ва абираларингиз Сизнинг номингиз билан узоқ асрлар ғурур ва фахр туйиб юришади Худо хоҳласа.
Ватанимиз тинчлиги, келажагимиз равнақи йўлида мустаҳкам соғлик-саломатлик тилайман. Умрингиз узоқ бўлсин, Илоҳим.
Туғилган кунингиз қутлуғ бўлсин!" - дея ёзиб қолдирган Марказий Осиё ММA Конфедерацияси, ММA ва Ўзбекистон Триатлон Федерацияси президенти, Президент хавфсизлик хизмати бошлиғининг ўринбосари Отабек Умаров.
Шунингдек, Ўзбекистон президенти оиласига яқин бўлган, Масс-медиа фонди Васийлик кенгаши раиси Комил Алламжонов ҳам давлат раҳбари суратини қолдириб, ўзига хос табригини йўллади.
"Муаммолар ҳақида очиқ, эркин гапиришга шунчалик тез ўргандик-ки, овозимизни чиқармай, чекка-чеккада пичирлашиб юрган пайтларимизни эсламай ҳам қўйдик.
Яна кўп нарсаларни деярли унутдик. Динимизга очиқ эътиқод қилишдан қўрққан пайтларимизни ҳам. Азон товушини фақат масжидларнинг ёнгинасида туриб эшитиш мумкин бўлганини ҳам. Жамоат жойларида “диний либос”да юргани учун кўча-кўйда ушланиб, 15 суткага обориб тиқилганларни ҳам.
“Кўча” курси, биржа курси, давлат курси иборалари-чи, эсингиздами? Қора қозонини қайнатиш учун боласи чет элдан юборган долларни “валютчиклар”дан алиштирган отахон-онахонлар қонунан жиноятчига айланган пайтларни эслайсизми?
Пенсиясини картадан ечолмай, супер-маркет кассаларида сарғайиб, навбатда турганларга ялинган қариялар-чи, ёдингиздами?
Ҳозир бирор чет элликка “картадаги пулимизни 20 фоизлик ставка – зарари билан нақд пулга айлантирганмиз”, деб гапириб берсак, ишонмаса керак.
МХХдаги “катталар”га ёқмай қолганлар йўқ жойдан туҳмат билан қамаб юборилган даврлар эсингиздами?
Адолат қарор топди. Туҳмат ёки арзимаган айби туфайли қамоқда ўтирган қанчадан қанча юртдошимиз бугун озодликда. Улар билан бирга оилаларига қувонч, хотиржамлик, барака қайтди. Мамлакатимизнинг ҳар бир чеккасида азон товуши янграяпти. Диндошларимиз эркин ибодат қилмоқда. Йиллаб сарсон юрган минглаб бошпанасизлар уйли бўлди, яна қанчаси давлат ҳимоясига олинди. Конвертация очилди. Текширувлар тўхтади, тадбиркорда ҳаловат пайдо бўлди.
Хуллас, гапирса, гап кўп.
Асосийси, бу ўзгаришлар халқ учун ва халқ дарди билан яшайдиган бир инсоннинг қарору иродаси билан амалга ошди. Ва кечаги кунини унутмаганлар бу инсон учун дуода. Холис дуода хайр, барака, яхшилик бўлиши шубҳасиз.
Сиз учун жуда кўпчилик дуода.
Таваллуд кунингиз муборак, муҳтарам Президент!" - дейилади Алламжонов табригида.
