Токио-2020 ёзги Олимпиадасининг бешинчи кунги беллашувларини Ўзбекистон спорт делегацияси таркибида дзюдочиларимиз бошлаб беришди.
Аввал хабар қилганимиздек, -70 кг вазн тоифасидаги дзюдочи қизимиз Гулноза Матниязова илк даврада Чад терма жамоаси аъзоси Демос Мемнелоумни иппон ҳисобига мағлубиятга учратди ва иккинчи даврага йўл олди.
Бироқ, айни пайтда Туризм ва спорт вазирлиги Ахборот хизматининг хабар беришича, иккинчи даврада Матниязова анча жиддий рақиб – шу йил Венгрияда ўтказилган жаҳон чемпионатининг бронза медали совриндори, икки карра Европа чемпиони, “Мастерс”, "Катта Дубулға", Гран-при турнирлари ғолиб ва совриндори, нидерландиялик Санне ван Дийкега қарши татамига чиқди ва имкониятни бой берди.
Энди ван Дийке финалга чиқиши учун мухлислик қиламиз, ўшанда Гулноза бронза медали учун курашиш имкониятига эга бўлади.
Ўзбекистоннинг 2020 йилдаги энг яхши спортчиси деб топилган Давлат Бобонов ҳам Токио Олимпиадасидаги иштирокини ғалаба билан бошлади.
-90 кг вазн тоифасида татамига тушган дзюдочимиз илк даврада италиялик Николас Мунгаига қарши баҳс олиб борди ва рақибини вазари баҳоси эвазига мағлубиятга учратди. Унинг кейинги рақиби Украина терма жамоаси аъзоси Куеджау Набали бўлади.
