Ижтимоий тармоқларда кўча ўртасида жанжал юзага келгани акс этган видеолар тақалгани ҳақида хабар берган эдик. Қарши шаҳрида содир бўлган жанжалда катта кўча ўртасида пичоқ кўтариб юрган кимса аслида ўсмир йигит бўлган. Бу ҳақда “Севимли” телеканалининг “Замон” информацион дастури мухбирининг воқеа жойидан тўплаган тафсилотларида маълум қилинди.
Тафсилотларга кўра, ўсмир йигитча 2021 йил 24 июль куни соат 16:30ларда супермаркетдаги сотувчи қизнинг олдига келиб, қўпол сўзлар билан уни ҳақорат қилган. Шу вақтда унинг ноўрин хатти-ҳаракатларини олдини олмоқчи бўлган супермаркет қўриқчиси ўсмирга қизга қўполлик қилмасликни уқтирган. Йигитча қўриқчига “Сен аралашма!” деб ўзи билан олиб юрган ошхона пичоғи билан тан жароҳати етказмоқчи бўлган.
Шу тариқа савдо мажмуасининг ичида бошланган тортишувнинг кўчада давом этганлиги шов-шувларга сабаб бўлган.
Қарши шаҳар “Чармгар” МФЙда яшовчи вояга етмаган П.С. ҳозирда қилмишидан пушаймон эканлигини билдирган.
Мазкур ҳолат юзасидан Қарши шаҳар ИИО ФМБ 3-сонли ИИБ ҳузуридаги Тергов бўлинмаси томонидан 24 июль куни П.С.га нисбатан Жиноят кодексининг 277-моддаси 3-қисми «г» банди билан жиноят иши қўзғатилиб, дастлабки тергов ҳаракатлари олиб борилмоқда.
