Тошкент вилояти Бўстонлиқ туманидаги “Аллюр” от спорти клубида болалар ва ўсмирлар ўртасида конкур (тўсиқларни ошиб ўтиш) бўйича халқаро мусобақалар бўлиб ўтмоқда.
25-27 март кунлари бўлиб ўтиши белгиланган мазкур “миллатлар кубоки”да Ўзбекистон, Россия, Германия, Қозоғистон ва Қирғизистондан ёш спортчилар иштирок этишмоқда.
Мусобақаларнинг биринчи куни илк босқичда 21 нафар спортчи иштирок этди. Умумий натижалар бўйича ёш ҳамюртимиз Абдушукур Собиржонов “Ремтекер” лақабли отида 1230 балл тўплади ва биринчиликни қўлга киритди. Иккинчи ўринни олган яна бир ўзбекистонлик Аъзам Раҳматов “Тайсон” лақабли оти билан 1200 балл тўплади. Учинчи ўрин ҳам ҳамюртимиз Нодир Мирсаидовга насиб этди. У “Наврўз” лақабли отда 1140 балл тўплай олди.
Иккинчи босқичда ҳам ёш чавандозларимиз пешқадамликни қўлдан беришмади. Миррауф Одилов “Рижана” лақабли отда белгиланган масофани 42,56 сонияда босиб ўтли ва мутлақ ғолиб деб топилди. Иккинчи ва учинчи ўринлар 45,11 сониялик натижа кўрсатган Абдушукур Собиржонов ҳамда белгиланган масофани 45,18 сонияда босиб ўтган Аъзам Раҳматовга насиб этди.
Бугун ушбу мусобақалар доирасида жамоавий беллашувлар бўлиб ўтди. Ҳар бир мамлакат вакиллари ўз тулпорлари билан белгиланган тўсиқларни ошиб ўтиб, тез ва бехато маррага етиб келишга ҳаракат қилишди. Якуний натижаларга кўра “Ўзбекистон-2” жамоаси биринчи, “Ўзбекистон-1” жамоаси иккинчи ўринни эгаллади. “Россия-2” жамоаси вакиллари ғолиблик шоҳсупасининг учинчи поғонасини забт этишди.
Эртага мусобақаларнинг гран-при баҳслари бўлиб ўтиши кўзда тутилган.
