Россия Федерациясида ўзбекистонлик меҳнат мигрантларига зарур консуллик ва ҳуқуқий ёрдам кўрсатиш мақсадида Санкт-Петербург шаҳридаги Бош консулхона, Ташқи меҳнат миграцияси агентлигининг ваколатхонаси ва “Uzbekistan airways” АЖ вакиллари Килининский тумани уй-жой коммунал хизматида вақтинча меҳнат фаолиятини амалга ошираётган фуқаролар билан учрашув ўтказди. Бу ҳақда Ташқи меҳнат миграцияси агентлиги хабар бермоқда.
Бундан ташқари Ленинград вилоятидаги қурилиш компанияларидан бирида ишлаётган юртдошларимиз мурожаатларига кўра, ушбу компания қурилиш майдонига ташриф буюрилди.
Мурожаатга кўра, фуқароларимиз ушбу корхона томонидан жорий йилнинг январь-февраль ойларида ишга таклиф этилган. Уларнинг иш жойига етиб келиши учун авиачипта, вақтинча рўйхатдан ўтиш ва патент харажатлари иш берувчи томонидан қопланган. Фуқаролар олти ой мазкур корхонада ишлагандан сўнг юқоридаги харажатлар ишчилардан ундирилмаслиги юзасидан оғзаки келишувга эришилган. Лекин 30 июль куни навбатдаги иш ҳақи берилаётганда 34-35 минг рублдан патент учун қилинган харажатлар ҳеч қандай изоҳларсиз ушлаб қолинган.
Мазкур ҳолатга аниқлик киритиш мақсадида компания масъул ходимлари билан музокара олиб борилди. Уларнинг сўзларига кўра, агарда фуқаро 6 ой давомида ишлаб берса, авиачипта харажатлари олинмаслиги ва патент учун ушланган пуллар бир йилдан сўнг, 13-ойлик маош сифатида қайтарилиши тушунтириб ўтилди.
