Япониянинг Токио шаҳрида давом этаётган ХХХII ёзги Олимпия ўйинлари дастуридан ўрин олган бугунги баҳсларни енгил атлетикачиларимиз бошлаб беришди. Бу ҳақда Туризм ва спорт вазирлиги Ахборот хизмати хабар қилди.
Хабарга кўра, ҳозиргина аёллар ўртасидаги етти кураш баҳсларининг узунликка сакраш мусобақалари ҳам ўз якунига етди. Қувонарлиси, ушбу мусобақада иштирок этаётган спортчимиз Екатерина Воронина ўзининг севимли дастурларидан бири бўлган узунликка сакраш баҳсларида 6.11 метр натижа қайд этиб, ўз гуруҳида 3-ўринни, умумий ҳисобда эса 11-ўринни эгаллади.
Ушбу кўрсаткич орқали спортчимиз ўз ҳисобига яна 883 очко ёзиб қўйди. Шу тариқа Воронина етти курашнинг бешта босқичидан кейин 4471 очко билан 19-поғонани эгаллаб турибди.
Эслатиб ўтамиз, ушбу йўналишда баҳсларга 24 нафар атлет киришган эди. Улардан тўрт нафари эса мусобақадан чиқиб кетишди.
Олдинда Э.Воронинани мусобақа дастуридан ўрин олган найза улоқтириш ҳамда 800 метрга югуриш баҳслари кутиб турибди.
