Лионель Месси "Барселона" билан хайрлашувига бағишланган матбуот анжуманини кўзда ёш билан ўтказди (фото)

Бугун, 8 август куни Лионель Месси «Камп Ноу» стадионида хайрлашув матбуот анжуманини ўтказди. Клуб раҳбарияти, мураббийлар, жамоадошлари, оила аъзолари ва журналистлар йиғилган тадбирга сўзга чиққан аргентиналик 34 ёшли ҳужумчи кўз ёшларини тия олмади. 

Лионель Мессининг «Барселона» билан хайрлашувига бағишланган матбуот анжуманида аргентиналик ҳужумчи клубни тарк этишни истамагани ҳақида гапирди.

"Хайрли кун. Сўнгги бир неча кундан бери бу ерда нимани гапира олишим ҳақида кўп ўйладим. Чунки бошим қотган эди, ҳозир ҳам ўзимда эмасдек мен гўё. Бу ердаги узоқ фаолиятимдан кейин ҳозирги вазиятда мен учун жуда қийин. Очиғи, бунга тайёр эмасдим.

Бюрофаксга боғлиқ ўтган йилги воқеалар тарихда қолди. Аммо бу йил ҳеч қаерга кетмоқчи эмасдим. Оилам билан Барселонада қолишга ишончимиз комил эди. Бу ер менинг уйим. Уйимда қолишни ҳаммадан ҳам кўпроқ хоҳлагандим. Каталонияда бахтли эканлигимни доим такрорлаб келганман. Барселонадаги ҳаётим менга ёқарди. Бунинг барчаси ажойиб эди", - дейди аргентиналик футболчи матбуот анжуманида.

Лионель Месси «Камп Ноу»даги хайрлашув матбуот анжуманида қачонлардир «Барселона»га яна қайтишга умид билдирди.

"Бу клубнинг ажралмас бир қисми бўлиш учун қачонлардир яна қайтишга умид қиламан. «Барселона» жаҳоннинг энг яхши клуби бўлиб қолиши учун бу ерга қайтиб, ҳар қандай ролда бўлишга тайёрман. 

Ҳозир жуда кўп нарса эсимга келмаяпти. Чунки айни пайтда нимадир ҳақида ўйлаб гапирадиган аҳволда эмасман", - дейди Лионель матбуот анжуманида.

Эслатиб ўтамиз, Месси 2003 йилдан буён «Барселона» асосий таркибида тўп суриб, 10 марта Ла Лига чемпиони, 7 карра кубок ва Суперкубок соҳиби, 4 маротаба ЕЧЛ ғолиби ва 3 мартадан Европа Суперкубоги ва клублар ўртасидаги ЖЧ ғолиблигини қўлга киритган.