Бугун, 10 август куни Халқаро рейтинг ва индекслар билан ишлаш бўйича республика кенгашининг йиғилиши бўлиб ўтди. Уни Сенат Раиси, Кенгаш раиси Танзила Нарбаева олиб борди. Бу ҳақда Олий Мажлис Сенати ахборот хизмати маълум қилди.
Видеоконференцалоқа тарзида ўтказилган йиғилишда Кенгаш аъзолари, вазирлик ва идоралар мутасаддилари иштирок этган.
Унда ижтимоий-иқтисодий ва сиёсий-ҳуқуқий соҳага оид устувор халқаро рейтинг ва индексларда Ўзбекистон Республикасининг ўрнини яхшилаш бўйича 2021 йилга мўлжалланган чора-тадбирлар режасининг биринчи ярим йилликдаги ижроси, Жаҳон иқтисодий форумининг Глобал рақобатбардошлик индексида Ўзбекистон Республикасининг ўрнини акс эттириш бўйича чора-тадбирлар режасининг ижроси ҳамда Ўзбекистон Республикаси Президентининг 2021 йил 14 январдаги “Ўзбекистон Республикасида ҳуқуқ устуворлигини таъминлаш ҳолатини аниқлашнинг самарали механизмини жорий этиш чора-тадбирлари тўғрисида”ги қарорининг ижроси тўғрисидаги масалалар муҳокама қилинган.
Қайд этилишича, сўнгги уч ой давомида бир қатор халқаро рейтингларда Ўзбекистоннинг ўрни яхшиланган. Хусусан, «S&P» Global Ratings томонидан юритиладиган суверен кредит рейтингида Ўбекситон рейтинг прогнози “салбий”дан “барқарор”га оширилган.
Парламентлараро иттифоқ томонидан юритиладиган “Сиёсатдаги аёллар” жаҳон рейтингининг “Парламентдаги аёллар” қисмида Ўзбекистон 130-ўриндан 45-ўринга кўтарилган. Жаҳон хайрия индексида 114 та давлат орасида Ўзбекситон 53-ўриндан 29-ўринга, яъни деярли икки баравар кўтарилган.
