Судьялик лавозимига номзодларни муносиблигини баҳоловчи электрон дастур ишга туширилди. Бу ҳақда АОКАда Судьялар олий кенгаши мутасаддилари иштирокида ўтказилган матбуот анжуманида маълум қилинди.
Президент фармонига асосан судьялик лавозимларига муносиб кадрларни танлаш ва тайинлашнинг янги тартиби жорий этилди. Бунда холислик ва шаффофликни таъминлаш вазифаси белгиланди.
Биринчидан, ОАВ орқали бўш судьялик лавозимларига очиқ танловлар мунтазам эълон қилиб борилмоқда.
Иккинчидан, судьялик лавозимига танлаш ва тайинлашга оид очиқ танловларга ахборот технологиялари татбиқ этиш йўлга қўйилди.
Натижада инсон омили кескин чекланиб, танлов жараёни очиқ ва шафоф ўтиши таъминланмоқда.
Танловни бевосита ва билвосита (онлайн тарзда) кузатиб бориш имконияти яратилди.
Учинчидан, Судьялик лавозимига номзодлар ва судьяларнинг психологик портрети бўйича касбга муносиблигини баҳолашга кўмаклашувчи электрон дастур ишлаб чиқилиб, синовдан муваффақиятли ўтиб, тўлиқ ишга туширилди.
Жумлажан "Психологик тест" электрон дастури ёрдамида номзоднинг қатъийлик, босиқлик, жиззакилик, стрессга чидамлилик, коррупция, алкоголизмга мойиллик ва бошқа психологик хусусиятлари аниқланади.
Психологик тест натижаси профессионал психолог томонидан ўрганиб чиқилиб, тавсиявий характерга эга бўлган хулоса тузилади. Мазкур хулоса номзоднинг судьялик лавозимига тайинланишида алоҳида эътиборга олинади.
Маълумот ўрнида, жорий йилнинг биринчи яримида мазкур янги тартиб ва очиқ танлов асосида 202 нафар (ёки барча номзодларнинг 72,4 фоизи) номзод судьялик лавозимига тайинланган.
"Яна бир янгилик: Судьялар олий кенгаши томонидан судьялар фаолиятини электрон рейтинг орқали очиқ ва шаффоф баҳолашнинг аниқ мезонлари ишлаб чиқилди. Мазкур электрон дастурни амалиётга татбиқ этиш чоралари кўрилмоқда", - дейилади хабарда.
