Ҳукумат қарори билан Ҳудудларни комплекс ижтимоий-иқтисодий ривожлантириш бўйича секторлар фаолияти самарадорлигини баҳолаш тартиби тўғрисидаги низом тасдиқланди.
Низомга кўра, Президент ҳузуридаги Давлат хизматини ривожлантириш агентлиги томонидан секторлар фаолиятини баҳолаш бир йилда бир маротаба – ҳисобот йилидан кейинги йилнинг 1 февралига қадар амалга оширилади.
Натижаси бўйича таҳлилий маълумотнома Президент Администрацияси, Вазирлар Маҳкамаси ва халқ депутатлари Кенгашларига киритилади.
Баҳолаш натижасига кўра туман, шаҳар секторлари ўртасида республика даражасида – “энг намунали сектор” ҳамда Қорақалпоғистон Республикаси, вилоятлар ва Тошкент шаҳри даражасида – “энг ташаббускор сектор” номинациялари бўйича ғолиблар аниқланади ва рағбатлантирилади.
Баҳолаш қуйидаги устувор йўналишларда амалга оширилади:
- “Темир дафтар”, “Аёллар дафтари”, “Ёшлар дафтари” билан ишлаш натижадорлиги;
- “маҳаллабай” ишлаш тизимининг юритилиши ҳолати;
- иқтисодий ривожланиш ва ижтимоий хизматлардан фойдаланиш даражаси;
- тадбиркорликни ривожлантириш;
- жиноятчиликни камайтириш ва ижтимоий-маънавий муҳитни соғломлаштириш;
- мурожаатлар билан ишлаш самарадорлиги.
Шунга кўра, ғолиб бўлган секторлар қуйидагича рағбатлантирилади:
“Энг намунали сектор” номинациясида:
▪️ 1-ўрин – БҲМнинг 500 баравари;
▪️ 2-ўрин – БҲМнинг 400 баравари;
▪️ 3-ўрин – БҲМнинг 300 баравари миқдорида пул маблағи.
“Энг ташаббускор сектор” номинациясида:
▪️ 1-ўрин – БҲМнинг 200 баравари;
▪️ 2-ўрин – БҲМнинг 150 баравари;
▪️ 3-ўрин – БҲМнинг 100 баравари миқдорида пул маблағи.
Қарорга кўра, секторлар фаолияти самарадорлиги кўрсаткичларини ҳисоблаш ва баҳолаш бўйича “sektor.reyting.uz” автоматлаштирилган онлайн ахборот тизими ишга туширилади.
