Ташқи меҳнат миграцияси агентлиги ҳамда Россия Федерациясининг “РЖДстрой” акциядорлик жамияти ўртасида темир йўл қурилишида ишлаш учун бўш иш ўринларига Ўзбекистон фуқароларини ишга жалб қилиш бўйича келишувларга эришилган. Бу ҳақда агентлик маълум қилди.
Ушбу келишувларга асосан ташкил этилган танловдан муваффақиятли ўтган фуқароларнинг 7 нафари белгиланган тартибда тиббий кўрикдан ўтказилиб, суғурта хизматлари кўрсатилди ва Бухоро халқаро аэропортидан Иркутск вилоятига ташкиллаштирилган тартибда вақтинчалик меҳнат фаолиятини амалга ошириш учун жўнатилди.
Таъкидлаш жоизки, ушбу фуқароларнинг йўл ва турар жой билан боғлиқ барча харажатлари иш берувчи томонидан қопланмоқда.
Шунингдек, Агентлик ва Россия Федерациясининг “ПСП” масъулияти чекланган жамияти ўртасида имзоланган келишувга асосан 25 нафар фуқаро Тошкент – Новосибрск – Благовещенск йўналишидаги авиарейси, “Балтранс” корхонаси ўртасида имзоланган келишувга асосан 5 нафар фуқаро Тошкент –Санкт-Петербург йўналишидаги авиарейс орқали ишлаш учун ташкилий тартибда Россияга жўнатилди.
Хорижга вақтинчалик меҳнат фаолиятини амалга ошириш учун кетаётган фуқаролар билан тарғибот-ташвиқот ишлари олиб борилди. Уларга тарқатма материаллар берилди.
