Фарғона шаҳрида 18 июнь куни икки гуруҳ ўртасидаги қуролли тўқнашувнинг олди олинди. Бу ҳақда Ички ишлар вазирлигининг Youtube’даги «Криминал» кўрсатувида хабар қилинди.
Маълум бўлишича, Фарғона шаҳри Оқариқ кўчасида 18 июнь соат 13:30 атрофида икки машина ўртасида йўл-транспорт ҳодисаси содир бўлган. Оқибатда ҳайдовчилар ўртасида жанжал чиққан ва улар бир жойда кўришиб, орани очиқ қилишга келишган.
Қайд этилишича, келишилган жойга икки тарафдан жами 20 нафарга яқин эркак келган. Фарғона вилоят Ички ишлар бошқармаси, Жиноят-қидирув бошқармаси, Давлат хавфсизлик хизмати ва Миллий гвардия ходимлари воқеа жойига етиб бориб, улардан ўткир тиғли жисмлар, жумладан, пичоқ ва қиличлар, гиёҳвандлик воситаларини расмийлаштирган.
Таъкидланишича, 8 нафар шахс процессуал тартибда ушланган, 9 нафарига маъмурий қамоқ жазоси қўлланилган. Ҳолат юзасидан Жиноят кодексининг 277-моддаси (Безорилик) 3-қисми «б» банди билан жиноят иши қўзғатилган, дея хабар қилди Bugun.uz.
