"Агробанк”нинг туман филиали масъуллари тадбиркор Муҳриддин Раҳимқуловнинг видеочиқишига муносабат билдириб, у таъминотчи корхонадан 27 миллион сўмлик маҳсулот олиб, 100 миллион сўмлик маҳсулот олганини билдириб, банк раҳбариятини чалғитишга уринганини маълум қилди.
Ушбу чиқишга" Агробанк" Деҳқонобод филиали муносабат билдирди.
Қайд этилишича, “Фарангизбону чирой” хусусий корхонаси раҳбари Муҳриддин Раҳимқулов АТБ “Агробанк” туман филиалига Президентнинг 2019 йил 24 ноябрдаги қарори асосида автомойка va нонвойхона жиҳозлари сотиб олиш учун 100 миллион сўм кредит ажратишни сўраб мурожаат қилган.
Шунга асосан “Фарангизбону чирой” хусусий корхонаси va банк ўртасида 2021 йил 5 август куни кредит шартномаси имзоланиб, кредит суммасининг 15 фоизи яъни 15 миллион сўм пул маблағи 18 август куни таъминотчи корхонага яъни, “Жасурбек Жаҳонгир Жавоҳир” оилавий корхонасига ўтказиб берилган. Шундан сўнг, “Фарангизбону чирой” хусусий корхонаси раҳбари M.Раҳимқулов таъминотчи корхонадан маҳсулотларини тўлиқ олганлигини билдириб, буни тасдиқловчи ҳужжат бўлган юк хатларини банкка тақдим қилган. Юк хатлари “Фарангизбону чирой” хусусий корхонаси раҳбари томонидан имзоланиб, корхона муҳри босилган.
Банк раҳбарияти 2021 йилнинг 30 август куни ушбу ҳолат бўйича тадбиркор хонадонида бўлиб, мониторинг ўтказганда “Фарангизбону чирой” хусусий корхонасига 100 миллион сўмлик маҳсулотдан 27 миллион 715 минг сўмлик маҳсулотлар (1 дона карчер, 1 дона компрессор, 1 дона плесос, 1 дона кўпик хайдагич, 22 дона мачалка, 10 дона драп, 25 метр шланка, 2 тонналик сув идиш, шампунлар) етказиб берилганлиги, қолган 72 миллион 285 минг сўмлик маҳсулотлар етказиб берилмасдан юк хатларига сохта маълумотлар киритилганлиги аниқланган.
Банк масъулларининг ёзишича, тадбиркор ушбу қилмишини яшириш мақсадида ижтимоий тармоқлар орқали чиқиш қилиб, жамоатчиликни чалғитишга уринмоқда. Шу боис, банк раҳбарияти бу ҳақда тўпланган ҳужжатларни ҳуқуқий баҳо бериш туман прокуратурасига тақдим қилган.
