Ўзбекистонда дам олиш кунлари ҳаво сезиларли даражада салқинлаши кутилмоқда. Бу ҳақда Ўзбекистон гидрометерология хизмати хабар бермоқда.
Қайд этилишича, бугун ва эртага Ўзбекистонда қуёшли ва жуда илиқ об-ҳаво сақланиб туради. Термометр устуни кундуз кунлари 32-34° гача кўтарилади, маълумотга кўра, бу ушбу кунлар меъёридан 4-6° юқори ҳисобланади.
Якшанба куни эса республика ҳудудининг катта қисмида илиқ ҳаво массаларининг кириб келиши сақланиб туради, кечаси ҳарорат 15-17° ни, кундуз куни 35-37° ни ташкил этади. Якшанба куни республиканинг шимолий ҳудудларига Волга бўйи ҳудудларидан салқин ҳаво кириб келиши бошланади. Кечга томон Қорақалпоғистонда ва Хоразм вилоятида баъзи жойларда бироз ёмғир ёғиши мумкин. Ҳаво ҳарорати кечаси 7-12° гача, кундуз куни 20-25° гача пасаяди.
Душанба куни салқин ҳаво Ўзбекистоннинг барча ҳудудига тарқалади. Республика бўйича ҳарорат фони кескин пасаяди ва ҳафтанинг биринчи ярми давомида кундуз кунги ҳаво ҳарорати 23-27°, кечаси 12-15° атрофида бўлади.
26-27 сентябрь кунларида салқин ҳаво массасининг кириб келишида булутли қатламлар кўпаяди ва баъзи жойларда шамол 15-20 м/с гача кучаяди.
Ҳафтанинг иккинчи ярмида ҳаво ҳароратининг янада пасайиши кутилмоқда.
