Олтиариқдаги пахта қабул қилиш пунктида ёнғин чиқди. Бу ҳақда ФВВ хабар берди.
Қайт этилишича, 2021 йил 27 сентябрь куни соат 13:27да Олтиариқ тумани "Полосон" МФЙ, Марғилон кўчасида жойлашган пахта қабул қилиш пунктида ёнғин содир бўлаётганлиги тўғрисида Фарғона вилояти Фавқулодда вазиятлар бошқармасига хабар келиб тушади.
Воқеа жойига 9 та ёнғин-қутқарув экипажи соат 13:35 да етиб боради, соат 14:00 да ёнғин қуршаб олиниб, соат 14:34 да батамом ўчирилган.
Маълумотга кўра, ҳодиса оқибатида жабрланган ва ҳалок бўлганлар йўқ. Ҳозирда ёнғин сабаби ва моддий зарар миқдори аниқланмоқда.
Шу ўринда, ФВВ: "Ҳурматли фуқаролар, пахта тез аланга олувчи хомашёдир. Мавсумни ҳар томонлама беталофат ўтказишда ёнғин хавфсизлиги қоидаларига риоя этинг",– дея аҳолига мурожаат қилмоқда.
