Фуқаролар мурожаати билан Тошкент кўчаларида тунаб юрган аёл уйли бўлди.
Шаҳар ИИБ ушбу ҳолат ҳақида расмий саҳифаси орқали баён қилди.
Унга кўра, бошқармага фуқаролар мурожаат қилиб, "Буюк Ипак Йўли" метро бекати ёнида бир неча кундан буён ўтирган кекса ёшдаги аёл ҳақида хабар беришади. Қария яқинларининг эътиборисиз қолгани аниқланади.
Мирзо-Улугбек тумани ИИО ФМБ хотин-қизлар масалалари бўйича катта инспектори подполковник О.Б. Матчанованинг суҳбат давомида аниқлашича, кекса ёшдаги аёлнинг исми Любовь Ивановна экан.
Маълумот берилишича, унинг ёнида ҳужжатлари йўқ бўлган, тура-жойини эслай олмади, яқинлари эса хорижга чиқиб кетишган экан.
Ходимларнинг ёрдами билан Ивановна Аёлларни реабилитация ва мослаштириш марказига жойлаштирилган.
"Бефарқ бўлмасдан ушбу ҳолат ҳақида хабар берган фуқароларимизга миннатдорчилик билдирамиз",-дейилади хабарда.
