Мутахассисларнинг айтишича, янги қуриладиган кўприк ва кўприкка қадар бўлган 10 километрга яқин темир йўл ҳамда кўприкдан кейинги ҳудудда 70 километрдан ортиқроқ темир йўлнинг барпо этилиши натижасида 240 километр ортиқча ҳаракатланишнинг олди олинади.
Натижада автомобил ҳамда темир йўл йўналишида ташилаётган юкларнинг манзилга етиб бориш вақти ҳам 6 соатга қисқаради. Бундан ташқари, ушбу кўприк орқали ўтаётган юкларнинг йиллик самараси 150 миллиард сўмга яқин бўлади. Шунингдек, бугунги кунда Хоразм вилояти ва Қорақалпоғистон Республикаси ўртасидаги темир йўл орқали ташилаётган юкларнинг ўртача ҳажми 12 миллион тоннани ташкил қилаётган бўлса, янги кўприк ҳамда темир йўл қурилганидан сўнг юклар ҳажми лойиҳанинг ўзини оқлаш муддатига етиб боргунга қадар 20-25 миллион тонна атрофида бўлади.
Мазкур объект қурилишининг буюртмачиси “Ўзбекистон темир йўллари” акциядорлик жамияти бўлиб, «Боштранслойиҳа» акциядорлик жамияти бош лойиҳачи этиб белгиланди. Янги лойиҳани молиялаштириш Тикланиш ва тараққиёт жамғармаси, «Ўзсаноатқурилишбанк» акциядорлик тижорат банки кредит маблағлари ҳамда “Ўзбекистон темир йўллари” акциядорлик жамиятининг ўз маблағлари ҳисобидан амалга оширилиши белгиланди. Шундан сўнг 2021 йилнинг январ ойи бошларида “Ўзбекистон темир йўллари” акциядорлик Жамияти тасарруфидаги «Кўприкқурилиш» трести” унитар корхонаси, Йўл хўжалиги бошқармаси ҳамда тармоқнинг бошқа корхоналари ишчи-ходимлари томонидан Амударё қирғоғида янги кўприкни қуриш ишлари бошлаб юборилди. Бунинг учун дастлаб зарур техникалар ва мутахассислар жалб этилди.
Белгиланган лойиҳага кўра дастлаб умумий узунлиги 80,2 километр бўлган темир йўл линиясини ҳамда ушбу оралиқдаги 2 та қўриқланадиган ва 18 та қўриқланмайдиган темир йўл кесишмасини қуриш белгиланди. Шунингдек, 4 та авто йўл ўтказгичини, 9 та кўприкни ҳамда 25 кишига мўлжалланган 1 дона, 50 кишига мўлжалланган 2 та темир йўл вокзалини бунёд этиш, яна битта темир йўл ва автомобил йўли қўшма кўприги ва бошқа темир йўлга техник хизмат кўрсатиш бино ва иншоотларини қуриш кўзда тутилди.
Бугунги кунгача лойиҳада кўрсатилган 80,2 километрлик участкада режага кўра йўлсозлар томонидан умумий ер ишлари якунига етказилиб, 3,575 километрлик пўлат излар ётқизилди. Шунингдек, мазкур йўналишда 233 та сунъий иншоот (ПЖБТ)ни қуриш режалаштирилган бўлиб, бу вазифалар тармоқнинг Махсус механизасиялаштирилган йўл стансияси (СПМС) корхонаси ҳамда «Кўприкқурилиш» трести” унитар корхонасига қарашли отрядларнинг мутахассислари томонидан амалга оширилмоқда. Эътиборлиси “Эйвалек махсус темир бетон” акциядорлик жамияти ҳамда “Хоразм темир йўл қурилиши” унитар корхонаси томонидан ушбу объектга зарур бўлган сунъий сув ўтказгич иншоотлари конструкциялари ишлаб чиқарилмоқда.
Тайёр бўлган маҳсулотлар эса қурилиш объектига ўз вақтида етказилмоқда. Шунингдек, «Кўприкқурилиш» трести” унитар корхонаси таркибига кирувчи корхоналарга конструкцияларни қўйиш учун буюртмалар берилди. Ҳозирги кунда барча сунъий сув ўтказиш иншоотида пойдеворларни қазиш ишлари тугатилиб, 4 февралдан темир-бетон конструкцияларни монтаж қилиш ишлари бошлаб юборилди.
Айни пайтда 13- ҳамда 14-Кўприкқурилиш отрядлари томонидан ишчилар турар жойлари, бетон чиқариш узелларини ўрнатиш, ҳудудни бетон тўсиқлар билан ўраб олиш ишлари амалга оширилмоқда. Бугунги кунда қурилиш майдонига 85 та замонавий техника ҳамда 230 нафарга яқин мутахассис жалб этилган.
Мутахассисларнинг таъкидлашича, мазкур йирик лойиҳа фойдаланишга топширилгач эксплуатасия харажатларини камайтириш, темир йўл участкасининг ўтказиш ва ўтказувчанлик қобилиятини кўтариш, янги иш ўринларини ташкил қилиш, юк вагонлари айланмасининг ортишига эришилади. Шунингдек, бу лойиҳа ҳудуднинг экологик муҳитини яхшилашга, замонавий коммуникасия тизимини ва ресурс тежаш технологиялари ривожланишини таъминлашга ҳам хизмат қилади. Қолаверса, мамлакатимизда сайёҳлик соҳасини ривожлантириш, аҳоли ва сайёҳларга хизмат кўрсатиш сифатини янада оширишга сабаб бўлади.
