Кинематография агентлиги буюртмасига биноан “Ватан” киностудияси томонидан “Чегара” бадиий фильмининг суратга олиш ишлари давом этмоқда. Бу ҳақда Агентлик Ахборот хизмати хабар бермоқда.
Ҳозирги кунда фильмнинг айрим жангари саҳналари Туркиянинг Газиантеп, Суриянинг Алеппо шаҳрида олинмоқда. Кинокартинада ўзбек актёрлари билан бирга таниқли турк актёрлари Экрем Испир, Аҳмет Серкан, Ўзтурк Сезай ва бошқалар роллар ижро этган.
Мазкур кинокартина чегарачилар ҳаёти, уларнинг чегара ортидаги машаққатли заҳмати ва касбига бўлган фидойилиги ҳақида яратилади. Шунингдек, фильм воқеалари замирида бағрикенглик, тинчлик, қўшни давлатлар билан тинчлик ва дўстона муносабатлар каби мавзулар ўрин олган.
Сценарий муаллифи ва постановкачи режиссёр Ҳилол Насимов, постановкачи оператор Умид Маликов, постановкачи рассом Исобек Эгамбердиев, овоз оператори Абдуқаҳҳор Каримов, иккинчи режиссёр Жамолиддин Қўзибоев, картина директори Шоҳрух Насимов, либослар бўйича рассом Нигора Пўлатова.
