Вилоят ҳокими Хайрулло Бозоров Риштон тумани Тўраобод МФЙда фаолият юритаётган ёш тадбиркор Саидаҳмад Акбаров томонидан ташкил этилган электроскутерлар ва юк мотороллерларини йиғиш цехида бўлди.
Энергия тежамкор, хавфсиз ва экологияга зарар етказмайдиган мазкур транспорт воситаларининг таркибий қисмлари Хитойдан келтирилиб, Риштондаги “Start-Max” масъулияти чекланган жамиятида фойдаланишга тайёр ҳолда сотувга чиқарилмоқда. Корхонада маҳсулотларга талаб юқори бўлган даврда юздан зиёд ишчи-ходим меҳнат қилади.
Мини, классик, хай-тек каби тўққиз хилдаги мотороллерларнинг бугун вилоят бўйича бозори чаққон. Ҳозиргача ана шундай транспорт воситаларидан 1000дан ортиқ йиғилиб, савдога чиқарилган. Нархи мотор қувватига қараб 12 миллиондан 20 миллионгача бориши мумкин.
Вилоят ҳокими билан мулоқот чоғида тадбиркор, ишлаб чиқаришни кенгайтириш истагида эканини билдирди. Унга Риштон туманида ёки Фарғона шаҳрида фойдаланилмай бўш турган бино иншоотлардан жой ажратиш бўйича иш ташкил этиш юзасидан масъулларга кўрсатма берилди.
