Зангиотада онасига тазйиқ ўтказиб, уйида жанжал кўтарган шахс унга нисбатан ИИБ ходимлари куч ишлатганини айтаётгани тўғрисида хабар берган эдик.
Ички ишлар вазирлиги матбуот котиби Шоҳрух Ғиёсов ўзининг телеграм каналига аслида ҳолат қандай бўлгани юзасидан видеолавҳани эълон қилди.
Маълум қилинишича, 9 ноябрь куни соат 20:00 ларда ушбу фуқаронинг онаси туман ИИБга мурожаат қилиб, ўғли мунтазам равишда спиртли ичимликлар истеъмол қилиши ва айни дамда ҳам маст ҳолатда жанжал кўтараётганини билдирган.
Онанинг сўзларига кўра, У.М. исмли ўғли масжидда қоровулликдан бўшаб, яна спиртли ичимликка ружу қўйган ва уйда жанжал чиқаришни бошлаган. Ушбу хабарга асосан тунги хизматга бириктирилган ИИО ходимлари воқеа жойига етиб борганида фуқаро У.М. маст ҳолатда бақир-чақир қилиб, оила аъзолари ва атрофдагиларни безовта қилаётганига гувоҳ бўлган.
Фуқаронинг ўзи ҳам нима бўлганини эслолмаслигини айтган.
Туман ички ишлар биносида калтакланганини айтган фуқаро тиббий кўрикдан ўтказилган. Зангиота тумани Тез тиббий ёрдам бўлимининг маълумотномасига кўра, унда мастлик ҳолати ва чап кўзида шилиниш жароҳати борлиги маълум қилинган.
