Бу ҳақда Соғлиқни сақлаш вазирлиги хабар бермоқда.
Тиббий ёрдам тезкор ва ҳаммабоп бўлиши шарт. Бугун Ўзбекистон соғлиқни сақлаш тизими олдига шундай талаб қўйилган.
Аммо сўнгги йилларда ўлим хавфи юқори бўлган хасталиклар орасида айрим неврологик касалликлар кўрсаткичи барқарор ошиб бораётгани хавотирли ҳолат. Энг ёмони, юртимизда бу йўналишда реабилитация тадбирлари даражаси пастлиги ва бошқа қатор омиллар аҳоли ўртасида ногиронликнинг кўпайишига олиб келаётган эди.
Шу сабабли Президентимизнинг 2018 йил 30 августдаги қарори асосида Республика ихтисослаштирилган неврология ва инсульт илмий-амалий тиббиёт маркази ташкил этилиши белгиланди. Янги муассаса “диагностика – аниқлаш – даволаш – реабилитация” тизими асосида фаолият юритиши кўзда тутилган.
Яқинда Ўзбекистон Республикаси соғлиқни сақлаш вазирлигида юртимизга икки ҳафталик миссия билан келган Япония халқаро ҳамкорлик агентлиги(JICA)нинг Марказий Осиё ва Кавказ мамлакатлари бўйича бўлими директори Сота Тосака бошчилигидаги делегация вакиллари иштирокида айни шу масалада мулоқот ташкил этилди.
Музокаралар чоғида Республика ихтисослаштирилган неврология ва инсульт илмий-амалий тиббиёт марказини қуриш ва жиҳозлаш лойиҳаси концепцияси муҳокама этилди.
Шу ўринда савол туғилади: бу жараёнга нега айнан Япония вакиллари жалб этилди?
Гап шундаки, инновацион тиббий технологиялар ва илғор диагностика ускуналарини ишлаб чиқариш ҳамда даволаш усулларини қўллаш борасида “кунчиқар мамлакат” дунёда пешқадамлар сафида. Қолаверса, япон мутахассисларининг бу соҳадаги илғор ва бой тажрибаси биз учун жуда муҳим.
Учрашувда Соғлиқни сақлаш вазирлиги мутасаддилари Ўзбекистон тиббиёти тизимидаги ҳар бир лойиҳа институционал ўзгаришларни ўзида мужассам этиши, инновацион асбоб-ускуналар билан бир қаторда, илғор тажрибаларни жорий қилиш ҳам муҳимлигини таъкидлади.
Бундан ташқари, истиқболли лойиҳа шошилинч тиббий ёрдам муассасаларида диагностика ускуналарини янгилаш, япон ва ўзбек мутахассислари ўртасида ўзаро тажриба алмашишни кўзда тутади.
Мулоқот якунида 2022-2026 йилларга мўлжалланган лойиҳа техник-иқтисодий асосларни тайёрлаш бўйича қўшма ишчи гуруҳ тузилди.
