Бугун, 1 декабрь — халқаро ОИТСга қарши курашиш куни. Ушбу кунда бутун дунё бўйлаб бундай қўрқинчли касаллик туфайли вафот этган миллионлаб кишини ва уларнинг ортида қолган ғамгусор оилаларини ёдга олинади.
АҚШнинг Ўзбекистондаги элчихонаси маълумотига кўра, ОИТС илк бор 1981 йили аниқланганидан буён, у дунёдаги ҳар бир мамлакатни чуқур қайғуга ботириб, йўқотишларга олиб келган.
Таъкидланишича, 2017 йилда Ўзбекистонда тахминан 1900 киши шу касаллик туфайли вафот этган. ОИТС жаҳон миқёсидаги офат экан, унга қарши самарали курашиш учун халқаро ҳамкорлик катта аҳамият касб этади.
Сабаби ОИТС шундай бир қотилки, у на жинс, на ирқ, на миллат ва на чегара билади.
UNAIDS маълумотига кўра, 2004 йилдаги энг юқори кўрсаткичдан буён, бутун дунёда ОИТС билан боғлиқ ўлим икки бараварга камайган. 1996 йилдан эса янги ОИВ инфекциялар 47 фоизга қисқарган.
Айни вақтда ҳам Қўшма Штатлар ОИВ/ОИТС ҳақидаги стигмани ҳам камайтириш учун иш олиб бораётгани таъкидлнади.
ОИВ/ОИТС гепатит ё сил сингари бир инфекция бўлиб, АҚШ бу касалликни очиқ муҳокама қилишга, унга чалинган беморлар эса қўрқув ва ё таъқибсиз у ҳақда эркин гапира олиши учун шароит яратишга чақиради. ОИВ ва ё ОИТСга чалинганларни камситиш нафақат инсон қадр-қимматини таҳқирлаш, балки ушбу пандемияни назорат қилишга оид глобал саъй-ҳаракатларга ҳам путур етказиш демакдир.
