Жаҳон соғлиқни сақлаш ташкилоти янги штамм кенг тарқалишининг олдини олиш учун одамларга тезроқ вакцина олишни тавсия қилаётир. Бу ҳақда Ўзбекистон Соғлиқни сақлаш вазирлиги хабар бермоқда.
Таъкидланишича, ҳозиргача 100 дан ортиқ мамлакатларда аҳолини эмлаш кўрсаткичлари 40 фоизга ҳам етмайди.
Ташкилот раҳбари Тедрос Гебрейесуснинг маълум қилишича, дунёдаги эмланмаган қатламнинг катта қисми Африка қитъасида яшовчи одамлардир. Чунки ушбу минтақа мамлакатлари етарлича вакцина захираларига эга эмас.
Шунингдек, Т. Гебрейесус шу кунгача жаҳондаги мавжуд вакциналарнинг 80 фоиздан ортиғи “Катта йигирматалик” (G20) давлатлари ўртасида тақсимланганини маълум қилди.
Анчайин қашшоқ ҳисобланган Африка мамлакатлари эса жами ишлаб чиқарилган вакциналарнинг атиги 0,6 фоизинигина олган, холос.
"Бундай ҳолат қанчалик узоқ давом этса, коронавируснинг тарқалиш ва мутацияга учраш имкониятлари шунчалик кенгайиб бораверади” — дейди ЖССТ раҳбари.
Бундай огоҳлик қўнғироғи қатор давлатларда вакцинация жараёнларини янада жадаллаштириб юборди. Жумладан, Италияда айни пайтда жамоат транспортидан СOVID-19га қарши эмланганликни тасдиқловчи сертификати йўқ фуқаролар фойдаланиши ҳолати аниқланса, улар катта миқдорда жаримага тортилмоқда.
