Сенат раиси куни кеча бўлиб ўтган мажлисда ота-оналарга мурожаат билан чиқди. Нарбаева ўқитувчиларни ҳурмат қилишга чақириб, шундай деди:
"Барчамиз – онамиз, отамиз ва ўз фарзандларимиз таълим-тарбияси учун масъулмиз. Лекин тан олиб айтишимиз керак, бугунги ўқувчи ҳам, ота-оналар ҳам кечаги эмас",-дея таъкидлайди у.
Хусусан, мактабларда эркак ўқитувчиларнинг камайиб кетгани ҳам катта муаммо эканлигини айтади.
"Фарзандининг арзимаган шикояти учун мактабга югуриб келиб ўқитувчига "ташланиш"дан кўпчилик ота-оналар уялмай қўйди. Бу эса жамиятда ўқитувчи мақомининг обрўсизланишига олиб келмоқда.
Ҳурматли ота-оналарга мурожаат қилмоқчиман: фарзандим ҳаётда ўз ўрнини топишда қийналмасин, мустақил фикрли, мулоҳазали инсон бўлиб вояга етсин десангиз болангиз қалбида ўқитувчига эҳтиром ҳиссини тарбияланг ва ўзингиз ҳам устозларни эъзозланг",-дея огоҳликка чақиради Сенат раиси.
У сўзининг якунида ўқитувчи ўқувчи ёки унинг ота-онаси томонидан оёқости қилинадиган одам эмас, балки зиё тарқатувчи инсон, керак бўлса ҳаммадан бир поғона юқори турувчи шахс эканлигини алоҳида айтиб ўтган.
