Ўзининг фойдали, мазали ва тўйимлилиги билан машҳур бўлган турк нонуштаси нон ва чексиз чой билан бирга, кичик идишлардаги ширин ва шўр егуликлардан иборат. Турклар нонуштага алоҳида эътибор берадилар ҳамда уни ўтказиб юбормайдилар.
Турк нонуштаси, одатда, помидор билан қовурилган тухум(менемен)ни ўз ичига олади. Бодринг ва помидор, зайтун, турли хилдаги пишлоқлар, асал, қаймоқ, мураббо, сариёғ ва колбасалар нонуштанинг ажралмас бўлаги ҳисобланади. Бундай нонушта турини турклар “сочма нонушта” деб атайдилар.
Нонуштанинг ўзига хослиги шундаки, у ўзининг саноқсиз идишлардаги тўйимли таомлари билан бутун бир оилани, дўстларни ва қариндошларни атрофида жамлайди ва ўзининг ранг-баранглиги билан барчанинг кўзини қувнатади.
Турк нонуштасининг яна бир ажралмас бўлаги бу- симитдир. Юзига кунжут сепилган, тешик кулчани эслатувчи юмшоққина нон, яъни симит турк халқининг севимли егулигидир. Айниқса, шошилинч нонуштада бир бўлак пишлоқ ва симитнинг ўзи ҳам етарли. Ёшу қари симитни севиб истеъмол қилади.
