Forbes нашри 2021 йилда энг кўп пул топган спортчилардан иборат рейтингни эълон қилди. Бу галги рейтингдан спортнинг барча турларида миллионларга эга чиққан инсонлар жой эгаллади. Одатда, футболчи ва баскетболчилар бундай рейтингларда юқори ўринларга эга бўлишарди. 2021 йил сарҳисобини кўздан кечирар эканмиз, ўтган йил вазият ўзгарганига гувоҳ бўламиз...
КОНОР МАКГРЕГОР (АРАЛАШ ЖАНГ ВАКИЛИ)
ДАРОМАДИ: 149 миллион евро.
Ирландиялик аралаш жанг вакили бўлган Конор Макгрегор 2021 йилда энг кўп пул топган спортчи номига сазовор бўлди. Бунга қайсидир маънода ўзига тегишли бўлган айрим акцияларни сотиш, реклама шартномалари сабаб бўлди. 2021 йилда Макгрегор машҳур спорт кийимлари бренди ҳамда кўпчилик билган видеоўйин орқали мўмай даромад соҳибига айланганди. Шунингдек, икки маротаба Дастин Порье билан жангда иштирок этиши орқали ҳам ўз ҳисоб рақамини бойитиб олди.
Лионель Месси (футболчи)
ДАРОМАДИ: 107,6 миллион евро.
Нуфузли нашр тадқиқотларига кўра, иккинчи ўриндан “ПСЖ” ҳамда Аргентина терма жамоаси футболчиси Лионель Месси жой эгаллади. У бир йил давомида 107 миллион евро ишлаб топган.
Леонинг асосий даромадларига келсак, у ҳомийлик шартномалари туфайли жуда катта маблағларга эга бўлди. Шунингдек, “ПСЖ”га ўтиши ҳам яхшигина миқдорда мукофот пулларини олиб келди. Қолаверса, футболчининг парижликлар сафидаги маоши ҳам юқори. Бугунги кунда Месси машҳур чанқоқбосди ичимлик компаниясинингюзи ҳисобланади.
Криштиану Роналду (футболчи)
ДАРОМАДИ: 99,3 миллион евро.
Футбол тарихида биринчи миллиардерга айланган Криштиану Роналду 2021 йилда салкам 100 миллион евро ишлаб топди. Албатта, Роналду бу борада азалий рақиби бўлган Мессидан ортда қолди. “Манчестер Юнайтед”га ўтиши туфайли яхши даромадга эга бўлди. Қолаверса, ҳомийлик шартномалари унга улкан даромад тақдим қилди. Португалиялик спортчи ижтимоий тармоқлар ортидан футболдаги даромадидан асло кам маблағ топмайди. Қисқаси, у CR7 номи остида кўплаб ташкилотларнинг юзи ҳисобланади.
Дак Прескотт (американча футбол)
ДАРОМАДИ: 88,9 миллион евро.
Нашр тузган рейтингнинг 4-ўринидан Америка футбол юлдузи Дак Прескотт жой эгаллади. Ушбу спортчи ўтган йилда 88,9 миллион евро миқдорида маблағни ишлаб топди. Спортчининг “Dallas Cowboys” сафидаги йиллик маоши 40 миллион евродан юқори. Шунингдек, турли ҳомийлик ташкилотлари ҳам унга қўшимча маблағларни келтиради. Қисқаси, бугунги кунда у Америкада энг кўп пул ишлайдиган спортчи бўлиб, ҳаттоки баскетболчилардан ҳам устун эканини кўриш мумкин.
Леброн Жеймс (баскетболчи)
ДАРОМАДИ: 79,9 миллион евро.
Леброн ЖеймсниБаскетболнинг ҳозирги кундаги “қироли” дейиш мумкин. У ўтган йилда салкам 80 миллион еврога яқин маблағни ишлаб топди. Диққат билан эътибор беринг: Леброн Жеймснинг бугунги кунда “Лос-Анжелес Лейкерс” клуби билан кўп йиллик келишуви бор. У мазкур баскетбол жамоасида йилига 41 миллион евродан кўп маошга эга. Қолаверса, 206 см. Бўйга эга спортчи кўплаб машҳур брендлар билан ҳамкор ва улардан ҳам мўмай даромад топади. Ижтимоий тармоқларда эса яхшигина даромад келадиган саҳифаси мавжуд.
