Туризм ва спорт вазирлиги тадбиркорлар ҳамда ишбилармонларни экстремал спорт ва замонавий тоғ туризмини ривожлантиришга чорлайди. Бу ҳақда вазирлик ахборот хизмати хабар берди.
Мамлакатимизда ўзининг хилма-хил табиати, қулай об-ҳавоси туфайли тоғ спортининг барча турлари билан мунтазам шуғулланиш ҳамда экстремал туризмини ривожлантириш учун имконият яратилган.
Бугунги кунда Ўзбекистонда тоғ туризми шиддат билан ривожланиб бормоқда. Жумладан, сўнгги икки йил ичида умумий узунлиги 6 километрни ташкил этувчи “Амирсой” тоғ-чанғи курортининг дор йўли ишга туширилди.
2022-йилнинг биринчи ярим йиллигида “Чиноркент” дор-йўли ўз фаолиятини бошлаши режалаштирилган. Белдирсой дам олиш маскани эса қайта реконструкция қилиниб, янги, замонавий дор йўли ишга туширилади. Шунингдек, Чимён масканида янги тоғ-чанғи курорти бунёд этилиши белгиланган.
Бўстонлиқ туманида тоғ туризми йўналишини янада ривожлантириб, уни янги босқичга олиб чиқиш, экстремал спорт ва замонавий тоғ машғулотларини кенг татбиқ этиш ҳамда шу орқали тадбиркорларга кўмаклашиш кўзда тутилган. Ушбу мақсадларда дор йўли, рафтинг, ропе-бунгее жумпинг, зиплине, cанёнинг, параплан машғулотлари учун мақбул бўлган ер майдонлари, тадбиркорлар таклифларини инобатга олинган ҳолда, белгиланган тартибда очиқ ауцион савдоларига чиқарилиши режалаштирилган.
Юқорида таъкидланган тоғ туризми, спорт ва экстремал машғулотларни йўлга қўйишда ташаббус кўрсатган тадбиркорлар қуйидаги маълумотларни Туризм ва спорт вазирлигининг info@motas.uz электрон почтасига юборишлари талаб этилади:
1. Тавсия қилинаётган лойиҳа тўғрисида батафсил маълумотлар акс эттирилган тақдимот (ПДФ форматида);
2. Лойиҳа учун талаб этиладиган ер майдони ҳамда унинг жойлашуви;
3. Ташаббускорнинг тегишли соҳадаги ва/ёки шунга ўхшаш лойиҳаларни амалга оширишдаги иш тажрибаси тўғрисида маълумот.
