2022 йилнинг 21 ноябрь куни Қатарда навбатдаги жаҳон чемпионати старт олади. Мундиалга тобора оз муддат қолмоқда. Ҳозирдан ушбу мамлакатнинг мундиалга қанчалик тайёрлигига эътибор қаратишнинг айни фурсатидир. Хўш, ўйинларга мезбонлик қиладиган стадионлар жаҳон чемпионати баҳсларини қабул қилишга тайёрми? Қуйида жаҳон чемпионати иншоотлари ҳақида батафсил маълумот тақдим қиламиз...
“ЛУСАИЛ АЙКОНИК” (Лусаил)
Сиғими: 80 минг томошабин (ЖЧдан кейин - 20 минг)
Лусаил бу Дохадан 20 км. жойлашган, ЖЧ учун махсус барпо этилган суперзамонавий шаҳар. “Лусаил Айконик” стадиони ҳам жаҳон чемпионати вақтида 10та учрашувни ўзида қабул қилади, жумладан, ярим финал ва финал ўйинлари ҳам айнан шу ўйингоҳда ўтказилади. Диққат қилинг, ЖЧ-2022дан кейин трибуналарнинг катта қисми йиғиштирилиб, бутун дунёдаги спорт лойиҳаларига хайрия қилинади. Ўриндиқлар сони 20 мингтагача камаяди. Стадиондан мактаб, шифохона, тижорат маркази, кафе ва ресторан сифатида фойдаланилади. Арена 2021 йилнинг 22 ноябрида тўлиқ битган бўлса-да, расман бирорта учрашув ўтказилгани йўқ.
“ХАЛИФА ИНТЕРНЕЙШНЛ” (Доха)
Сиғими: 45,416 томошабин
Қатарнинг энг муҳташам стадиони бўлган “Халифа Интернейшнл” 1976 йилда қурилган. 2017 йилда эса реконструкция қилинган. Бу ўйингоҳда 2019 йилда клублар ўртасида жаҳон чемпионати баҳслари ҳам ўтказилган ва финал баҳси ҳам шу ерда бўлиб ўтади. Унда “Ливерпуль” клуби ғолибликни қўлга киритади. Жаҳон чемпионати вақтида эса стадион жами 8та ўйинга мезбонлик қилади, жумладан, 3-ўрин учун кечадиган баҳс ҳам ўрин олган.
“АҲМАД БИН АЛИ СТЭДИУМ” (Ал-Райян)
Сиғими: 40 минг мухлис (ЖЧдан кейин - 20 минг)
“Аҳмад Бин Али Стэдиум” PatternDesign лойиҳасига қарашли бўлиб, АҚШнинг AECOMфирмаси томонидан қуриб битказилган. Бу компания ЖЧ-2010даги айрим стадионларни ҳам қурган. Хуллас, бу ўйингоҳ жаҳон чемпионати вақтида 7та учрашувни ўтказади. Яъни, 6та ўйин гуруҳ босқич доирасида ўтказилган, яна бир баҳс 1/8 финалга тўғри келади. ЖЧ-2022дан кейин сиғим икки мартага камаяди (20 мингга), аммо аренага талаб сақланиб қолади - у ерда мамлакатнинг энг машҳур клубларидан бири “Ал-Райян” ўз ўйинларини ўтказиши маълум қилинди.
“АЛ-ЖАНУБ” (Ал-Вакра)
Сиғими: 40 минг томошабин
Ал-Вакрада жойлашган ягона стадион – “Ал-Жануб” ҳисобланади. Бу шаҳар асосан балиқчилар учун мўжалланган. Ҳудудий жиҳатдан эса Қатардаги иккинчи рақамлидир. 40 минг мухлисни қабул қилади. Стадион архитектори британиялик аёл Заха Хадид. Мазкур аренада ЖЧ-2022нинг 7та ўйини бўлиб ўтади: 6таси гуруҳ босқичида, биттаси 1/8 финалда.
“АЛ-ТУМАМА” (Доха)
Сиғими: 40 минг томошабин (ЖЧдан кейин - 20 минг)
Маҳаллий архитектор Иброҳим Жайдага тегишли бўлган “Ал-Тумама” ўйингоҳи ўз бағрига 40 минг мухлисни қабул қилади. Стадион 2021 йилнинг октябрида очилди - Қатар амири кубоги финали ўтказилди. “Ал-Тумама” ЖЧ-2022нинг 8та ўйинини қабул қилади: гуруҳ босқичида 6та, 1/8 ва 1/4 финал босқичларида биттадан. Мундиалдан кейин сиғим 20 мингга қадар камайтирилади. Спорт мажмуаси ҳудудида эса спорт тиббиёти маркази ва меҳмонхона жойлашади.
“ЭДЬЮКЕЙШН СИТИ” (Ал-Райян)
Сиғими: 40 минг (ЖЧдан кейин - 20 минг)
Номидан ҳам англаш мумкинки, бу ўйингоҳ Қатарнинг таълим марказида қад ростлаган. Бу ерда бир нечта университет, фан ва таълим фонди бор. “Эдьюкейшн Сити” клублар ўртасидаги Жаҳон чемпионати ўйинига мезбонлик қилган. ЖЧ-2022нинг 8та учрашуви ушбу стадионда ўтади: гуруҳ босқичида 6та, 1/8 ва 1/4 финалда биттадан. Жаҳон чемпионати якунлангаидан сўнг стадион сиғими икки мартага камаяди. Йиғиштирилган трибуналар эса спорт ривожи йўлида бошқа мамлакатларга юборилади.
“РАС-АБУ АБУД” (Доха)
Сиғими: 40 минг (ЖЧдан кейин тўлиқ йиғиштирилади)
Жаҳон чемпионати вақтида 7та ўйини ўзида қабул қиладиган “Рас-Абу Абуд” ўйингоҳи жаҳондаги юк контейнерларидан қурилган илк иншоот ҳисобланади. Қисқача қилиб айтганда, “Стадион 974” номи берилган. Бу Қатарнинг халқаро телефон коди ҳамда қурилишда ишлатиладиган сонлар билан боғлиқ. Энг қизиғи шундаки, стадион мундиалдан кейин қурилишга ишлатилган барча ашёларини муҳтож давлатларга жўнатади. Буни мамлакат ҳукумати тасдиқлаган.
“АЛ-БАЙТ” (Ал-Хаур)
Сиғими: 60 минг томошабин (ЖЧдан кейин 32 минг)
Бу стадион турнирнинг аҳамияти жиҳатидан иккинчи рақамлиси ҳисобланади. Чунки очилиш учрашуви ҳам айнан шу ерда ўтказилади. Шунингдек, 9та ўйинни ўзида қабул қилади, жумладан, ярим финал баҳсларини ҳам кўрсатиш мумкин. Мазкур иншоот Қатарнинг ўтмиши ва келажагини намоён этади. Яън, Бедиун чодирларини эслатади. Мундиал якунланганидан кейин трибуналарнинг юқори қисми йиғиштирилиб, футболини ривожлантиришга интилаётган давлатларга ёрдам тариқасида жўнатилади. 60 минг томошабин учун мўжалланган трибуналар сони 32 мингача камайтирилади.
