Ўзбекистон футбол ассоциацияси биринчи вице-президенти Равшан Эрматов Ўзбекистон мезбонлигида ўтувчи йирик мусобақалар ҳақида гапириб ўтди. Бу ҳақда Трибуна маълум қилди.
— 23 ёшгача бўлган футболчилар ўртасидаги Осиё чемпионатининг мезбонлиги Ўзбекистонга берилишидан кўп нарса ютамиз. Мисол учун, битта гуруҳ ўйинларини Қаршидаги марказий стадионда ўтказишни режалаштиряпмиз. Бундан Қашқадарё футболининг халқаро мусобақаларни қабул қилиш тажрибаси, инфратузилмасини шакллантириб оламиз.
2023 йилги Осиё Кубоги саралашининг Ўзбекистон иштирокидаги гуруҳи мезбонлиги ҳам ўзимизга насиб этди. Июнь ойида бўлиб ўтадиган миллий жамоа иштирокидаги мана шу 3та расмий ўйинни Наманганда ўтказишни режалаштиряпмиз, — деди Эрматов.
Эслатиб ўтамиз, Ўзбекистон миллий жамоасининг саралаш учрашувлари 8, 11 ва 14 июнь саналарида бўлиб ўтади.
