Ла Лига президенти Хавьер Тебас юлдуз футболчиларнинг Испания чемпионатини тарк этиши Примерага молиявий томондан зарар келтирмаганини маълум қилди.
«Мессининг кетиши иқтисодий оқибатларга сабаб бўлдими? Йўқ. Ҳеч қандай зарар кўрмадик. Роналду ва Месси сингари юлдузларнинг Испаниядан кетиши Ла Лигага молийявий ҳолатига таъсир қилгани йўқ.
Роналдунинг А Серияга кўчиб ўтишидан кейин бу лига ўсди, дея олмайсиз. Биз яқинда ESPN билан 8 йиллик шартнома имзоладик. Ушбу медиахолдинг 8 йилдан кейин Ла Лигада кимлар ўйнашини билади деб ўйлайсизми? Йўқ, билмайди. Аммо улар шуни аниқ билишадики, Ла Лигада молиявий барқарорлик бўлади ва энг яхши ўйинчилар бизда тўп суришади», - дея Тебаснинг сўзларини келтирган El Periodico de Espana.
Аввалроқ, Тебас Килиан Мбаппенинг ёзда Ла Лигага кўчиб ўтиши турнир учун содир бўлиши мумкин бўлган энг яхши воқелик, дея айтиб ўтганди.
