Ла Лига президенти Хавьер Тебас Килиан Мбаппе ва Эрлинг Ҳоланднинг келажаги ҳақида гапирди.
«Ҳоланд «Барса»га, Мбаппе эса «Реал»га ўтишини истайман. Ўз даврида жаҳоннинг энг яхши икки ўйинчиси Месси ва Роналду жаҳоннинг энг яхши икки клубида тўп сурганди. Энди Ҳоланд ва Мбаппе бир лигада ўйнашини хоҳлардим. Бу борада мен «Реал» эмас, Ла Лиганинг ашаддий мухлисиман.
Мбаппе ўз клуби билан шартномани узайтирмаяпти. Унинг жамоасини тарк этиши эҳтимоли юқори. Килиан ўтиши мумкин бўлган ягона клуб сифатида матбуот фақат «Реал»ни ёзмоқда. Шундай экан, уни Ла Лигада кутишга ҳақлимиз. У «Реал» ва Примерага кўп нарса беради», - дейди Тебас ABC билан суҳбатда.
Аввалроқ, Мбаппе ва Ҳоланд трансфери «Реал»нинг ёзги мавсумдаги энг асосий икки мақсади экани ҳақида хабар берилганди.
