Президент Владимир Путиннинг Донецк ва Луганск халқ республикаларини "мустақил" давлатлар сифатида тан олиш қарорига жавоб бериш учун АҚШ Россияга санкция қўйиш орқали чора кўрмоқчи. Хусусан, АҚШ Россиянинг суверен қарзлари, бир нечта банк ва компанияларига қарши янги санкциялар киритди. Бу ҳақда CNBC' ёзмоқда.
АҚШ Молия вазирлиги хорижий активларни назорат қилиш бошқармаси санкция жорий қилинаётган банклар ва шахслар ҳақида маълумот берди.
Қайд этилишича, санкциялар Россиянинг молиявий аҳволини ёмонлаштиради, мудофаа секторига катта таъсир ўтказади.
"Бугунги ҳаракат Украинага қарши ҳаракатларни ва Россиянинг мудофаа билан боғлиқ шартномаларни молиялаштириш учун янги маблағ тўплаш қобилиятини чеклайди. Молия тизими, шунингдек, Путиннинг яқин атрофидаги нуфузли россияликлар ва уларнинг оила аъзоларига жуда қаттиқ зарба бўлади",-дейилади АҚШ Молия вазирлиги хабарида.
"Биз Россиянинг ҳаракатларини кузатишда давом этамиз ва агар у Украинага яна бостириб киришган уринса, Қўшма Штатлар тезда Россия иқтисодиётига жиддий ва узоқ муддатли таъсир кўрсатадиган кенг кўламли иқтисодий санкцияларни жорий қилади",-дейди у бу ҳали ҳамир учидан патир эканлигини айтиб.
Қайд этилишича, санкциялар жорий қилинган молиявий институтлар Россия иқтисодиётида муҳим роль ўйнайди ва миллиардлаб долларлик умумий активларга эга.
Байден, шунингдек, Қўшма Штатлар Россиянинг суверен қарзи бўйича кенг қамровли санкциялар жорий этишини эълон қилди.
"Бу биз Россия ҳукуматини Ғарб орқали молиялаштиришдан узиб қўйганимизни англатади", деди Байден Оқ уйда қилган чиқишида.
"У энди Ғарбдан пул йиға олмайди ва янги қарзларини бизнинг бозорлар билан ҳам, Эвропа бозорлари билан ҳам қоплай олмайди",-дейди у.
Дилбар Абдунабиева
