Тошкент шаҳрида "21 февраль – Халқаро гид ва экскурсиячилар куни" муносабати билан Ўзбекистон гидларининг V форуми бўлиб ўтди. Унда Туризм ва маданий мерос вазирлиги раҳбарияти, мамлакатимиздаги сайёҳлик компаниялари вакиллари, гидлар ва экскурсиячилар иштирок этишди.
Форумда туризм соҳаси мутахассислари ва иштирокчилар гидларнинг пандемия давридаги фаолияти ҳамда истиқболдаги янги имкониятлар бўйича фикр алмашишди.
"Мутахассислар томонидан ўрганиб чиқилган халқаро тажриба таҳлилига кўра, глобал инқироз шароитларида ички туризмни ривожлантириш энг тўғри йўналишдир. Буни инобатга олган ҳолда, мамлакатимизда соҳа вакиллари учун "Ўзбекистон бўйлаб саёҳат қил" дастури доирасида қатор имтиёзлар берилмоқда. Буларнинг барчаси аҳолини саёҳатга кенг қамраб олиш мақсадида амалга оширилмоқда.
Ўзбекистон Республикаси Президенти томонидан мамлакат иқтисодиётининг стратегик тармоғи сифатида жадал ривожланиб бораётган туризм соҳасида Ўзбекистоннинг ижобий қиёфасини шакллантиришга катта эътибор қаратилмоқда ва бу жаҳон ҳамжамияти томонидан юксак эътироф этилмоқда. Бунга мисол қилиб соҳани қўллаб-қувватлаш, мамлакатимизда туризм турларини диверсификация қилиш, Ўзбекистоннинг халқаро майдондаги жозибадорлигини ошириш йўлида 90 дан ортиқ норматив-ҳуқуқий ҳужжатларнинг қабул қилинганлигини келтириш мумкин. Туризм ва маданий мерос вазирлиги томонидан соҳадаги глобал инқироз ва янгича рақобат шароитларини инобатга олган холда "Ўзбекистоннинг 2030 йилгача бўлган даврда туризмни ривожлантириш стратегияси" ишлаб чиқилмоқда. Бу эса сайёҳларни жалб қилишда ноанъанавий ёндашувларини талаб қилади. Айни шу нуқтаи назардан, туристик бизнес вакиллари, гид ва экскурсиячиларни ушбу ҳужжатни ишлаб чиқишда фаол иштирок этишга чорлаймиз" – деди Туризм ва маданий мерос вазирининг биринчи ўринбосари Улуғбек Аъзамов.
Бундан ташқари пандемия даврида гидлар ва туристик компаниялар мутахассислари билан ҳамкорликда Ўзбекистоннинг янги туристик йўналишлари устида изланишлар олиб борилиб, улар томонидан 300 га яқин янги сайёҳлик йўналишлари ишлаб чиқилиб, сайёҳларга таклиф этилганлиги, айни кунларда эса Ўзбекистоннинг туристик маршрутларини ўз ичига олган умумий каталог ишлаб чиқилиб, уни кенг жамоатчиликка етказиш мақсадида ижтимоий тармоқларда иш борилаётганлиги таъкидланди.
Форум доирасида мутасаддилар томонидан Ўзбекистонга ташриф буюраётган сайёҳлар оқимини ошириш учун "барча хизматлар жамланган" тарифларга эга туристик дастурлар ишлаб чиқиш таклифи илгари сурилди.
