Ҳаёт инсонни турли синовларга рўпара қилиши мумкин, бироқ уни сабр, ирода ва келажакка бўлган умид билан енгиб ўтиш энг тўғри йўл. Бугун имконияти чекланган бўлса-да, кўпчиликка ўрнак бўлаётган ёшлар кўплаб топилади. Андижонлик Сафия Холмирзаева ана шундай интилувчан ёшлардан бири ҳисобланади. У ясаган буюмларни кўриб қўл меҳнати эканига ишонмайсиз.
"МЕН ҲАМ ТЕНГДОШЛАРИМ ҚАТОРИ ЎЙНАБ ЮРГАНДИМ..."
Сафия Холмирзаева, ҳунарманд:
— Олдин тенгдошларим қатори бемалол ўйнаб-кулиб юрардим. Кейин касаллик туфайли 9 ёшимдан имкониятим чекланган. Уйда шунчаки вақтим беҳуда ўтишини хоҳламаганман. Кўп ҳунарларга қизиққанман, айниқса мана шу тўқувчиликка ўзгача меҳр қўйдим. Қанийди соғлом одам бўлсаму, мен ҳам бу ҳунарни мукаммал ўрганиб кетсам, дердим. Бир куни синглим қўлимга тўқийдиган илгич ва ипни бериб “опа, мана бунақа қилиб тўқилади” деб секин-секин ўргата бошлади. У ипдан аввал занжир тўқишни ва тўқиш қоидаларини тушунтириб берган. Бу ҳунарда биринчи устозим синглим бўлган ва у сабаб ўрганиб олдим. Кейинчалик ўзимнинг қизиқишим ҳам ортиб бошқа шаклларда тўқишни кўпроқ ўргандим. Шундан кейин жиянларимга ҳар хил кийимлар тўқиб бера бошладим.
Қийинчиликлар бўлганда, ташлаб қўйгингиз ҳам келадими?
— Бошланишида ҳамма хато қилади, камчилиги бўлади. Агар тўқиган нарсам кўнглимдагидек чиқмаса яна қайтадан тўқиб чиқардим. Эсимда ўшанда бир кофта-юбка тўқигандим. Бир ойда тўқиб битказдим, аммо бир жойида хато кетгани учун уни бузиб ташлаб яна қайта тўқиб чиққанман. Уйдагилар “қилган меҳнатингга ачинмайсан-ей”, дейишарди. Албатта, ачинаман, аммо тайёрлаган ишингиз ўзингиз хоҳлагандек чиқса, бу ачиниш сизга ҳузур беради. Чарчоқларингиз чиқиб кетади-да. Такрор-такрор сўкиб ташлаб қайта тўқисам ҳам ўзимга ўзим тажриба бўлади бу, деб ҳам қўяман.
"ҲОЗИРДА КЎПРОҚ ГУЛЛАР ТЎҚИЙМАН"
— Бошида ўта қийинчиликлар кўп бўлган. Кийимлар тўқиш мушкулроқ эди. Ижтимоий тармоқлар орқали гуллар тўқилишини кўриб ўрганиб олдим. Ҳозирда кўпроқ гуллар тўқийман, уларнинг ҳам ҳар хил турини тўқишни биламан. Бошланишида 2-3 хил гуллар тўқий бошлаган бўлсам, ҳозирга келиб 10 дан ортиқ гуллар турини тўқишни биламан. Ўрганаман десам бундан ҳам кўпроғини ўрганишим мумкин, лекин мен учун ҳозирча шу етади, деб ўйлайман. Ушбу тўқиган гулларим даромад олиб келяпти. 35 мингдан 400 минггача бўлган тўқилган гулларим бор.
Шогирдларингиз ҳам борми?
— Шогирдларим ҳам бор. Асосан уларнинг кўпчилигини мактаб ёшидаги қизлар ташкил қилади. Улар дарсдан бўш вақтларида келиб ўрганишади. Уй бекаси бўлган аёллар ҳам уй ишларидан ортганларида келиб ўрганишади. Мендан ўрганиб уйларида ўзлари бемалол ушбу ҳунарни давом эттираётганлар жуда кўп. Олдиндан тўқишни билганлар эса келиб гуллар шаклларини тўқишни ўрганиб янада малакаларини ошириб кетишмоқда. Ҳозир кўпчилик шу тўқилган гулларни совға учун олаётгани сабабли шу ҳунарни ўрганиб рўзғорига ҳисса қўшишяпти, десам ҳам бўлади. Шогирдларимга ҳеч қачон ҳунарни пулга ўргатмаганман. Фақат маҳсулотини ўзлари билан олиб келишади, холос. Менга бу қўшимча амалиёт. Қанча ўргатсам шунча тажрибам ошиб бораверади. Шогирдларимнинг ёшини чегараламаганман. Ким ўрганишни хоҳласа ёшидан қатъи назар, келиб ўрганади, вақтимни аямайман.
Тўқиган гулларингизни қаерда сотасиз? Харидорлари кимлар?
— Тўқиган гулларимни кўпроқ гул дўконларига олиб бораман. Хориж гуллари сотадиган дўкон эгаси ушбу гулларимни ўзининг гулларига қўшиб сотиб беради, менга ёрдам бўлиши учун. Ушбу гулларни боғча, мактабдагилар ва бошқалар яқинлари учун совғага олишади.
Гул тўûиш учун ûанча ваûт сарфлайсиз?
— Гулни ҳажмига қараб вақт ҳам кўп ёки кам кетади. Каттароқ ҳажмдаги гулларни тўқишга бир ҳафта, кичикроқларига эса 2-3 кун кетади.
Яна нималарга ûизиûасиз?
— Бу ҳунарни ўрганишимдан олдин чеварчиликка қизиқардим, лекин бу менга қулай эмас эди. Агар имкониятим чекланмаганида бу ҳунарниям давом эттирган бўлардим. Либосларнинг дизайнларини чизиб юрардим. Рассомчиликка ҳам қизиқишим бўлган.
Бундан ташқари ўқишга киришни ҳам орзу қиламан. Тенгдошларимни ўқишга кирганини эшитиб ҳавас қиламан. Қанийди имконим бўлса-ю, мен ҳам ўқишга кирсам, деб қўяман ўзимга ўзим. Шукрлар бўлсинки, давлатимиз раҳбари томонидан хотин-қизлар таълими учун имкониятлар яратиб бериляпти. Бу йилги олдимга қўйган мақсадим ҳам олий таълим муассасаси талабаси бўлиш.
"ИНСОН МОТИВАЦИЯНИ ЎЗИДАН ИЗЛАШИ КЕРАК..."
— Одам ўзини ўзи хурсанд қилиб яшамаса, бу ҳаётда уни биров хурсанд қилмайди. Инсон ўзидан ўзи мотивация излаши керак, деб ўйлайман. Тушкунликка тушсангиз уни сизга ҳеч қандай фойдаси йўқ, аксинча баттар сизни ўз домига тортиб кетади. Худдики чуқурликка тушиб кетаётгадек бўлаверади, мен шунақа фараз қиламан. Юксалишингиз учун ўзингиз интилишингиз, олдингизга мақсад қўйишингиз керак. Бу гаплар кимларгадир эртакка ўхшаб туюлиши мумкин, лекин ҳаракат қилиб, курашса албатта босқичма-босқич кўтарилиб бориши мумкин. Чумолиям ўрмонда ерда юриб ҳаёт кечиради, атрофни кўриш учун эса чирмашиб бўлса-да дарахтга чиқиб атрофни кўради. Ҳаёт ҳам шундай, одам юксалиши учун машаққат чекиши керак. Бежизга машаққатсиз роҳат бўлмайди, деб айтишмаган.
Нарсаларни тўқиётганимда кўпинча қўлларим толиқиб кетади, баъзида кечки пайтдан бошлаб тонгга қадар тўқиб чиқаман. Шунда оғриганидан ўзимни ўзим юпатиб ҳали буни роҳатини кўрасан, ҳаммаси яхши бўлади, деб қўяман. Ишимни якунлаганимдан кейин эса чиройли чиққанидан завқланиб кетаман. Қийналганларим ҳам бир зумда унутилиб кетади.
Танловларда úам иштирок этиб турасизми? Ûандай ютуûларга эришгансиз?
— Ўзбекистон Республикаси Мустақиллигининг 30 йиллиги муносабати билан давлат хизматчилари ҳамда ишлаб чиқариш ва ижтимоий-иқтисодий соҳалар ходимларидан бир гуруҳини мукофотлаш тўғрисида Ўзбекистон Республикаси Президентининг Фармонига асосан “Жасорат” медали билан мукофотландим.
Имконияти чекланганлар ўртасида ўтказилган “Ватаним менинг нигоҳимда” танловида туманимизда ҳам, вилоятда ҳам биринчи ўринни олганман. Ҳунармандлар уюшмасига ҳам аъзоман, шу сабаб кўргазма, танлов ва бошқа тадбирларга бориб тураман. “Ташаббус” танловида 2019 йилда 2-ўринни қўлга киритганман. Ўтган йили онлайн тарзда ўтказилди ва бунда ҳам 2-ўринни олдим. Вилоятимиздан энг фаол иштирокчи сифатида фахрий ёрлиқ беришди. Туманимизда “Туризмга энг яхши ҳисса қўшган” номинацияси бўйича ҳам тақдирлашди. Ҳозиргача шу каби танловларда иштирок этиб келяпман. Мақсадим республика ва халқаро даражадаги танловларда иштирок этиб, олий ўринлар соҳибаси бўлиш. Дунё бозорига ҳам ўз брендим асосида чиқишни ният қилганман.
Мафтуна ЖЎРАЕВА суҳбатлашди
