Қашқадарё вилоятининг Шаҳрисабз тумани ҳокимлиги ҳоким Самад Ҳасановни савиясиз ва «тупой» деб атаган Кабул Дусовни прокуратурага берди. Бу ҳақда «Дарё» Самад Ҳасановнинг матбуот котиби Баҳодир Ҳалимовга таяниб хабар бермоқда.
Ҳокимликнинг маълумот беришича, Кабул Дусов ҳоким Самад Ҳасановга телефон қилиб, келинини ишга тиклашини талаб қилган. Ҳоким эса бу ҳақда суд қарори борлигини айтиб, бу иш унинг ваколатига кирмаслигини маълум қилган. Дусов эса ҳокимнинг бу жавобига нисбатан уни савиясиз ва «тупой» деб атаган.
Ҳокимлик Кабул Дусовни масалага бир томонлама ёндашишда айблаб, Самад Ҳасанов номига ҳақоратомуз сўзлар қўллагани учун унинг хатти-ҳаракатини чегарадан чиқиш дея баҳолаган.
«Кабул Дусов 25 март куни туман ҳокимига тўрт маротаба (10:02, 10:25, 11:20, 12:44) қўнғироқ қилиб, Адиба Нарзуллаева исмли фуқаро унинг келини, укасининг рафиқаси бўлишини, унинг меҳнат низоси билан боғлиқ муаммоси ечим топмаётганини, шунинг учун бу ишни ‘бир оғиз гапи билан’ ҳал қилиб беришини сўраган. Туман ҳокимлиги ушбу меҳнат низосини ҳал этиш мақсадида ишчи гуруҳ тузиб, вазиятни тўлиқ ўрганиб кўргач, бу масала юзасидан суд қарори борлигини аниқлаган. Шу боис ҳоким Кабул Дусовга бу иш юзасидан суд қарори чиққанини, шу боис мазкур масалага аралашолмаслигини, ваколатига кирмаслигини айтган», — дейди Баҳодир Ҳалимов.
Маълумот берилишича, Шаҳрисабз туманининг «Шакартери» МФЙ, Шовкан қишлоғида яшовчи фуқаро Мадина Расулова 2016 йил 3 январь куни туман тиббиёт бирлашмасига қарашли Шовкан қишлоқ врачлик пунктида ишловчи Адиба Нарзуллаеванинг туғуруқ таътилига чиқиши муносабати билан унинг ўрнига 0,5 ставка доя ҳамшираси сифатида ишга қабул қилинган. Тиббиёт бирлашма бошлиғининг 2017 йил 18 апрелдаги буйруғига кўра Шовкан ҚВПнинг юридик мақоми тугатилиб, янги ташкил этилган 39-қишлоқ оилавий поликлиникасига қўшиб юборилган. Шу сабаб 0,5 ставка доя ҳамширалик штати тугатилган ва барча ишчи ходимлар, шу жумладан, Мадина Расулова билан ҳам 39-ҚОП раҳбарияти ўртасида янги меҳнат шартномаси тузилиб, ишини давом эттирган.
Мадина Расулова кейинчалик янги ташкил этилган Кўп тармоқли марказий поликлиникада 0,5 ставкада регистратура ҳамшираси ва 0,25 ставкада АКГ ҳамшираси сифатида иш фаолиятини давом эттирган. Туман тиббиёт бирлашмаси бошлиғининг 2020 йил 1 майдаги буйруғи билан туғуруқ таътилидан қайтган Адиба Нарзуллаевага Мадина Расулованинг иш ўрни олиб берилган.
«Аслида Адиба Нарзуллаеванинг ҚВПдаги доя штати тугатилгани учун унга мавжуд вакант ўринлари таклиф этилиши керак эди. Бироқ иш берувчи Адиба Нарзуллаевага ўзининг доимий иш ўрнига эга бўлган Мадина Расулованинг 0,25 АКГ ва 0,5 регистратура ҳамшираси иш ўрнини олиб берган. Мадина Расулова эса Фуқаролик ишлари бўйича Шаҳрисабз туманлараро судига ариза билан мурожаат қилиб, ҳақ-ҳуқуқини талаб қилган. Суднинг 2021 йил 19 ноябрдаги қарорига кўра Шаҳрисабз туман тиббиёт бирлашмаси бошлиғининг 2020 йил 1 майдаги буйруғи ғайриқонуний деб топилган ва Мадина Расулова ўз ишига тикланган. Шундан сўнг, Адиба Нарзуллаевага яшаш ҳудудига яқин бўлган 39-оилавий поликлиникада фаолиятини давом эттириши учун иш таклиф этилган, аммо у бу таклифни рад этган. Кейинчалик Адиба Нарзуллаева президентнинг Шаҳрисабз туманидаги Халқ қабулхонаси билан биргаликда секторлар раҳбарлари томонидан ўтказиладиган фуқаролар қабулида бўлиб, ушбу масалани ўз манфаати йўлида ижобий ҳал этиб беришларини сўраган. Туман ҳокими эса унга суд қароридан норози бўлса, фақат манфаатдор томонларнинг ўзи юқори турувчи судга мурожаат қилиши мумкинлигини тушунтирган. Туман Адлия бўлимига мурожаатни қонун доирасида ўрганиб чиқиши ва амалий ёрдам бериши бўйича оғзаки кўрсатма берилган. Адлия бўлими Адиба Нарзуллаева мурожаатини ўрганиб чиқиб, фуқаронинг манфаатини кўзлаган ҳолда Шаҳрисабз туман тиббиёт бирлашмасига туғуруқ таътилидан қайтган Адиба Нарзуллаевани 0,5 ставка иш билан таъминлаш чорасини кўриши ҳақида огоҳлантириб, тақдимнома киритган», — дейилади ҳокимликнинг бу ҳақдаги расмий муносабатида.
Шаҳрисабз тумани ҳокими Самад Ҳасанов билан телефон орқали мулоқот қилган Кабул Дусов ҳокимга «судни сиз назорат қиласиз, ака», деб айтиб, ишини ҳал қилиб беришини сўраган.
«Ўрганишлар натижасида блогер сифатида танилган Кабул Дусовнинг Адиба Нарзуллаева билан қариндош эмаслиги маълум бўлди. Адиба Нарзуллаеванинг меҳнат низоси эса туман прокуратураси ва туман аҳоли бандлигига кўмаклашиш маркази томонидан қайта ўрганилиши белгиланди», — дейди ҳокимлик ахборот хизмати раҳбари.
Ҳокимлик Кабул Дусовнинг шахсий Telegram-канали орқали тарқатилган хабарда туман ҳокими шаънига нисбатан ҳақоратомуз сўзлар қўллангани учун блогер устидан қонуний тўхтамга келиш учун тўпланган ҳужжатлар ва суҳбатдошлар ўртасидаги аудиоёзувни вилоят прокуратурасига юборган.
Эслатиб ўтамиз, бир муддат аввал Халқ таълими вазирлиги Кобул Дусовни судга берган эди.
