"UzAuto Motors" Матбуот хизмати darakchi.uzга компаниянинг хорижлик Бош директори Бо Андерссоннинг журналистлар томонидан берилган саволларга берган жавобини тақдим этди.
Хусусан, у шундай деди:
— Бугунги Ўзбекистон автомобиль саноатини қандай кўрасиз? Унинг истиқболлари қандай?
— Умуман олганда, ёмон эмас. Республика аҳолисининг катта қисмини ёшлар ташкил этиши менда жуда ижобий таассурот қолдирди. Шу билан бирга, Ўзбекистонда ҳар 1000 аҳолига 91 та автомобил тўғри келади. Aгар бошқа мамлакатлар билан таққослайдиган бўлсак, бу кўрсаткич Россияда 385 та, Германияда 575 тани ташкил қилади. Бу эса соҳани ривожлантириш учун улкан салоҳият мавжудлигини кўрсатади. Ўзбекистон автомобиль саноатида ривожланиш учун имкониятлар мавжуд.
— Корхонани ривожлантиришдаги стратегиянгиз қандай?
— Ўзим учун тўрт асосий йўналишни белгилаганман. Биринчи навбатда, ишлаб чиқарилган автомобиллар сифатига эътибор қаратиш. Шуни алоҳида таъкидлашни истардимки, биз аллақачон уни 25 фоизга яхшилашга эришдик. Иккинчидан, автомобил ишлаб чиқариш ҳажмини кўпайтириш ва уларни истеъмолчига ўз вақтида етказиб берилишини таъминлаш.
Учинчидан, компания янада рақобатбардош бўлиши керак. Бу ривожланиш стратегиясининг муҳим пунктларидан бири ҳисобланади. Ушбу мақсадни амалга ошириш учун эса маҳаллийлаштириш даражасини ошириш, шу билан бирга ишлаб чиқаришда маҳаллий материаллардан фойдаланиш ниҳоятда муҳим аҳамият касб этади. Тўртинчидан, янги Chevrolet Tracker ва Chevrolet Оnix моделларининг ишлаб чиқарилишини йўлга қўйиш.
— Қандай қилиб навбатлар билан боғлиқ муаммони ҳал қилишни режалаштиряпсиз?
— Биз бунинг устида кечаю кундуз ишлаяпмиз, харидорлар орасида талабгир бўлган автомобилларни кўпроқ ишлаб чиқарамиз. Биз оммабоп автомобилларнинг ишлаб чиқариш ҳажмини оширдик. Lacetti автомобилини 262 тадан 366 тага (27 фоизга), Cоbalt автомобилини кунлик ишлаб чиқариш ҳажмини 342 тадан 420 тагача (18 фоизга) кўтардик.
Aвтомобилларни харидорларга етказиб бериш муддатини икки баробарга қисқартиришга эришдик. Aммо, афсуски биз ҳали ҳам керакли жойда эмасмиз. Ушбу мақсадга эришиш учун қўлимиздан келган барча ишни қилишимизга шахсан ўзим кафолат бераман. Aйтмоқчи, Spark автомобилини харид қилганлар катта эҳтимол билан автомобилни шартномада кўрсатилган муддатдан олдин олишлари мумкин бўлади. Nexia автомобилини эса, ҳеч қандай кутишларсиз дилерлардан олиб кетиш мумкин.
— Бозорда қандай янги моделлар пайдо бўлади?
— Бу йил бозорга янги модел — Chevrolet Tracker, келаси йил бошида еса Chevrolet Оnix’ни тақдим этамиз. Мижозларимизга бу замонавий икки автомобил ёқишига ишончим комил. Иккала моделда ҳам олтита хавфсизлик ёстиқчаси мавжуд. Улар ЙТҲга чидамлилик бўйича беш юлдузли рейтингга эга. Ушбу автомобиллар замонавий кўнгилочар тизим, Wi-Fi ва тўхташга ёрдам берувчи датчик билан жиҳозланган бўлади. Бундан ташқари, Chevrolet Tracker ва Chevrolet Оnix ёқилғи сарфи жиҳатидан жуда тежамкор — 100 километрга 6 литр.
