Туркия ва Ўзбекистон Республикалари президентларининг узоқ давом этган яккама-якка учрашувидан сўнг кенгайтирилган музокаралар бошланди, дея хабар бермоқда "Даракчи" мухбири Сардорбек Раҳмонқулов.
Шавкат Мирзиёев Туркия делегациясига ўз сўзини "Ота юртингизга хуш келибсиз!" - дея бошлаб, Туркияни Ўзбекистон мустақиллигини илк тан олган ва Тошкентда энг биринчи бўлиб ўз элчихонасини очган давлат эканлигини яна бир бор эътироф этди.
"Туркияда юртимиздаги қадамжоларга ташриф буюришни истайдиган миллионлаб инсонлар бор. Шу сабабли икки давлат ўртасида зиёрат туризмини ривожлантириш бўйича қўшма дастур ишлаб чиқишни таклиф этаман", - деди президент.
Ўз нутқи якунида Шавкат Мирзиёев Туркия президенти Ражаб Эрдўғанга сўз берди.
Туркия президенти ҳам ўз сўзларини самимият ва муҳаббат билан бошлаб, кириб келаётган Рўзаи Рамазон ойи бутун Турк ва Мусулмон оламига барокотлар олиб келишини тилади. У ҳам ўз нутқида Ота юртига келганидан хурсанд эканлигини таъкидлаб ўтди.
Музокаралар давом этмоқда. Батафсил маълумотлар билан кейинроқ таништирамиз.
