Кеча 29 март куни Адлия вазирлигида "Ўзбекистон – Европа Иттифоқи" адлия, ички ишлар, инсон ҳуқуқлари ва тегишли масалалар бўйича кичик қўмитасининг 18-йиғилиши ҳамда инсон ҳуқуқлари бўйича мулоқот бўлиб ўтди.
Йиғилишда Европа ташқи ҳаракатлар хизмати, Европа Комиссиясининг "Преференциялар бош тизими плюс" ("ГСП+") мониторинг миссияси ҳамда Ўзбекистон Республикасининг тегишли вазирлик ва идоралар вакиллари иштирок этдилар, дея Darakchi.uz'га маълум қилмоқда вазирлик.
Таъкидланишича, тадбирга Европа Иттифоқи делегациясига Европа ташқи ҳаракатлар хизмати Марказий Осиё бўлими бошлиғи Д. Крисслер, Ўзбекистон Республикаси делегациясига эса адлия вазири ўринбосари М. Икрамов бошчилик қилишган.
Инсон ҳуқуқлари бўйича мулоқотда томонлар Ўзбекистонда инсон ҳуқуқ ва эркинликларини таъминлаш, суд-ҳуқуқ тизимидаги ислоҳотлар, фуқаролик жамияти институтларини ривожлантириш, фикр юритиш ва уни ифодалаш ҳамда оммавий ахборот воситалари эркинлиги, меҳнат ҳуқуқлари, жиноят қонунчилигини такомиллаштириш, виждон эркинлиги, пенитенциар тизимни ривожлантириш ҳамда гендер тенглик масалалари юзасидан фикр алмашишган.
Инсон ҳуқуқлари ва қонун устуворлиги соҳасида халқаро ва минтақавий ташкилотлар билан кўп томонлама форумларда ҳамкорлик алоқаларини ривожлантириш масалаларида алоҳида тўхтаб ўтилган.
Европа Иттифоқи томони Ўзбекистонда инсон ҳуқуқ ва эркинликларини таъминлаш, фаол ва самарали фуқаролик жамиятини шакллантириш ва бошқа кўплаб соҳаларда амалга оширилаётган кенг кўламли ислоҳотларни юқори баҳолаган
Шунингдек, йиғилишда терроризмга қарши кураш, меҳнат миграцияси, чегараларни бошқариш, жумладан BOMKA дастури, гиёҳванд моддалар соҳасидаги стратегия (KADAP дастури), коррупцияга қарши кураш ва суд ислоҳотлари муҳокама қилинган.
