Жиззахда икки автомобиль ўртасида тўқнашув юз берди. Бу ҳақда вилоят Фавқулодда вазиятлар бошқармаси маълум қилди.
Маълум қилинишича, 23 апрель куни соат 13:40 ларда Жиззах вилояти Фавқулодда вазиятлар бошқармасига 4П-35 автомобил йўлининг Дўстлик тумани ҳудудидан ўтувчи қисмида йўл-транспорт ҳодисаси содир бўлганлиги тўғрисида маълумот келиб тушди.
Воқеа жойига зудлик билан бошқарма ёнғин-қутқарув отряди ҳамда Дўстлик тумани ФВБдан қутқарувчилар бўлинмаси етиб келди.
Аниқланишича, Гагарин-Жиззах йўналишида ҳаракатланаётган Нехиа машинаси қарама-қарши йўналишдаги Лаcетти билан тўқнашуви натижасида йўл-транспорт ҳодисаси содир бўлган.
Қутқарув ишлари давомида Лаcетти салонида қисилиб қолган ҳайдовчи махсус ускуналар ёрдамида чиқарилди ва тиббиёт ходимларига топширилди.
Йўл-транспорт ҳодисаси оқибатида Нехиа ҳайдовчиси оғир тан жароҳатлари туфайли воқеа жойида вафот этган, яна уч нафар фуқаро турли тан жароҳатлари билан Мирзачўл тумани тиббиёт бирлашмасига ётқизилган.
