Шушадаги биринчи Халқаро пазандачилик фестивали нафақат тарихий, улуғвор ва аҳамиятли воқеа бўлди, балки Қорабоғда туризмни ривожлантиришга ҳам катта ҳисса қўшди. Бу ҳақда Озарбайжон давлат туризм агентлиги раиси Фуад Нагиев таъкидлади, дея хабар бермоқда "trend.az"
"Бу Озарбайжон Президенти Илҳом Алиевнинг ғалабали сиёсатидан далолат беради. Ҳайдар Алиев жамғармаси ва Давлат туризм агентлиги биргаликда кенг кўламли лойиҳани биринчи марта амалга ошираётгани йўқ. Ҳайдар Алиев жамғармаси уни оммалаштириш учун катта ишларни амалга оширмоқда. Биз Шуша шаҳрида биринчи Халқаро пазандачилик фестивалини ўтказмоқдамиз, унда кўплаб мамлакатлар вакиллари, Европа, Лотин Америкаси, Осиёдан меҳмонлар иштирок этди. Мамлакатимиз, дунё халқлари маданияти, анъаналари ва миллий таомларининг барча бойлигини яна бир бор намойиш этиш билан бирга, улкан сайёҳлик салоҳиятини ҳам кўрсатиш мумкин. Шуни таъкидлашни истардимки, гастрономик туризм устувор йўналишлардан биридир. Ўйлаймизки, бу фестиваль анъанавий бўлиб, бутун дунё эътиборини тортади, чунки Озарбайжоннинг ошпазлик анъаналари мамлакатимизнинг, унинг қадимий маданиятининг ўзига хос белгиларидан бири ҳисобланади”, - деди Фуад Нагиев.
Биринчи Шуша халқаро пазандачилик фестивали Ҳайдар Алиев жамғармаси ва Давлат туризм агентлиги ҳамкорлигида ўтказилмоқда. Фестиваль 5-8 май кунлари Германия, Россия, Австрия, Хитой, Франция, Грузия, Эрон, Исроил, Италия, Малайзия, Туркия, Япония, Белгия, Чехия каби давлатлардан пазандачилик ва халқаро экспертлар, вакиллар иштирокида бўлиб ўтди.
Фестивалда турли форматдаги 25 дан ортиқ павилён ўрнатилди. Ҳар бир павилён ташриф буюрувчиларни турли мамлакатларнинг меъморий услублари ва миллий мусиқалари намуналари билан кутиб олди.
