Лаборатория замонавий усуллар ёрдамида ирсий алмашинув касалликларини тасдиқлаш учун болаларни оммавий текшириш, беморларни даволаш самарадорлигини ошириш ва ҳомиланинг генетик синдроми бўйича хавф гуруҳини аниқлаш имконини беради, дея хабар бермоқда yuz.uz сайти.
Болаларда ирсий касалликларга барвақт ташхис қўйиш усулларини такомиллаштириш учун Инновацион ривожланиш вазирлиги томонидан Ургут туман инновацион ҳудудида "Ирсий касалликларни эрта аниқлаш учун "молекеуляр генетикага" асосланган замонавий инновацион лаборатория ташкил этиш мақсадида стартап лойиҳа тасдиқдан ўтган.
Ҳозирда туман тиббиёт бирлашмасида молекуляр генетик лабораторияси учун 4 та хона ажратиб берилди. Юқори технологик диагностика тиббиёт ускуналари, бутловчи буюмлар, реагентлар ва зарур материаллар келтириб, ўрнатилди.
Ирсий касалликларни тасдиқлаш учун болаларни оммавий текшириш, шунингдек, беморларни дори воситалари орқали ирсий касалликларни даволаш самарадорлигини ошириш ва текшириш амалга оширилади. Шунингдек, ҳомиланинг эрта босқичларида хавф гуруҳини аниқлаш учун ҳомиладорликнинг эрта муддатларида аёллар қони таҳлили босқичма-босқич биокимёвий текширувдан ўтказилади. Шу билан бирга 3 минг нафардан ортиқ аёлларни ҳомиладорликнинг босқичларида биокимёвий скринингдан ўтказиш режалаштирилган.
Маълумот учун: Таъкидланишича, ирсий касалликларнинг 6 мингдан ортиқ тури мавжуд. Улар турли даражада намоён бўлади. Баъзилари туғма бўлиб, ривожланишдаги нуқсонларга қараб аниқланади. Қариндошлар ўртасидаги никоҳда чақалоқлар ўлими, ақлий заифлик ва оғир туғма нуқсонлар хавфи деярли икки баравар ошади. Бугунги кунда дунёда ҳар 100 боладан 5-6 нафари генетик касаллик билан туғилади. Уларнинг аксарияти ирсий мойилликларга эга хасталикдир. Шу мойилликни эрта аниқлаш катта муаммолар юзага келишига йўл бермайди.
