Одамлар орасида маймун чечаги билан касалланган 131 та ҳолат маълум ва яна 106 та таҳлил текширилмоқда. Бу ҳақда ЖССТ маълум қилган.
23 май ҳолатига кўра, 17 та эндемик бўлмаган мамлакатларда маймун чечагининг 131 ҳолати қайд этилган ва яна иккита давлат — Судан ва Аргентина шубҳали инфекцияларни текширмоқда.
Энг кўп касалланиш Испания (40), Португалия (37) ва Буюк Британияда (20) аниқланган. Қайд этилишича, 106 та маймун чечаги касаллиги текширилмоқда, шундан 51 таси Испанияда.
Маймун чечаги камдан-кам учрайдиган вирусли инфекция бўлиб, у одамлар орасида ҳам учрайди. Бу одатда енгил касаллик бўлиб, кўпчилик бир неча ҳафта ичида тузалиб кетади, аммо баъзиларда асоратлар пайдо бўлиши мумкин. Маймун чечагининг дастлабки белгиларига иситма, бош оғриғи, мушак оғриғи, бел оғриғи, лимфа тугунлари катталашиши, титроқ ва чарчоқ киради. Шунингдек, тошма пайдо бўлиши мумкин, улар кўпинча юздан бошланади ва кейин тананинг бошқа қисмларига тарқалади.
