Жорий йилнинг 26 май куни Адлия вазирлиги томонидан спорт соҳасида фаолият юритаётган федерация ва ассоциациялар вакилларига семинар-тренинг ташкил этилди.
Тадбирда Миллий олимпия қўмитаси ва спорт бўйича фаолият кўрсатувчи 80 дан ортиқ нодавлат нотижорат ташкилотлари вакиллари иштирок этишди.
Семинар-тренинг давомида нодавлат нотижорат ташкилотлари фаолиятининг ҳуқуқий асослари, қабул қилинган қонун ҳужжатлари мазмуни, амалга оширилаётган ислоҳотлар ҳақида батафсил маълумотлар берилди, шунингдек улар фаолиятида юзага келаётган муаммолар ва йўл қўйилган камчиликлар муҳокама этилди.
Хусусан, ўтказилиши режалаштирилган тадбирлар тўғрисида хабарнома бериш, хорижий донорлардан пул маблағлари олишни келишиш тартиби, йиллик ҳисоботлар топшириш билан боғлиқ масалаларга тўхталиб ўтилди.
Адлия вазирлиги, Спортни ривожлантириш вазирлиги ва Миллий олимпия қўмитаси ўртасида электрон ахборот алмашинувини йўлга қўйиш орқали спорт ташкилотларига қулайликлар яратиш, чет эллик мураббийларни аккредитациядан ўтказиш жараёнларини соддалаштириш, шунингдек соҳани янада ривожлантириш масалалари алоҳида кўриб чиқилди.
Тадбир давомида нодавлат нотижорат ташкилотлари вакиллари билан келгусида бу каби тадбирларни кўпроқ ташкиллаштирилишига келишиб олинди.
Адлия вазирлиги Жамоатчилик билан алоқалар бўлими
