Президент Шавкат Мирзиёев жорий йилнинг 6 июнь куни Тошкент ерусти ҳалқа метросининг иккинчи босқичи қурилиши билан танишиш чоғида жамоат транспорти тармоғини кенгайтириш ва метрополитен инфратузилмасини ривожлантириш бўйича кўрсатмалар берган эди. Бугун ушбу ишларни ташкил этишга қаратилган лойиҳалар тақдимот қилинди.
Бу ҳақда давлат раҳбари матбуот хизмати хабар берди.
Президентга қилинган тақдимотда маълум қилинишича, Тошкент ерусти метросининг 2-босқичи доирасида 5та бекат шу йил охирида, қолган 2таси кейинги йил Наврўз умумхалқ байрами муносабати билан ишга туширилади. Замонавий электропоездлар олиб келиниб, Тошкентдан Хожикент, Бекобод ва Ангренга тезюрар қатнов йўлга қўйилиши режалаштирилгани айтилади.
Давлат раҳбари барча йўлларда инсонларга қулайлик ва хавфсизлик биринчи ўринда бўлиши лозимлигини таъкидлаган.
Метрополитен учун 14 та янги поезд олиб келиш, йўловчилар хавфсизлигини таъминлаш бўйича 2022-2025 йилларга мўлжалланган чора-тадбирлар дастурини ишлаб чиқиш бўйича кўрсатмалар берилган.
Шунингдек, таъкидланишича, Тошкентда жамоат транспорти етиб бормаган 26 та маҳаллага автобус йўналишлари очилиб, метро билан боғланади. Бунинг учун қўшимча электробуслар харид қилинади.
Ҳисоб-китобларга кўра, Тошкент вилоятидан пойтахтга кунига 1 миллиондан зиёд йўловчи кириб келади. Уларни метро бекатларига йўналтириб, ҳам аҳолига, ҳам транспортларга енгиллик яратиш зарурлиги айтилди.
