Жорий йилнинг 27 июнь куни Тошкент давлат шарқшунослик университетида Ўзбекистон Республикасининг Шанхай ҳамкорлик ташкилоти (ШҲТ) бўйича миллий координатори, сиёсий фанлар бўйича фалсафа доктори (PhD) Раҳматулла Нуримбетовнинг “Ўзгараётган дунё ва Шанхай ҳамкорлик ташкилоти” монографиясининг тақдимоти бўлиб ўтди.
Тадбирда Тошкент давлат шарқшунослик университети раҳбарияти, профессор-ўқитувчилари, докторантлари, Ташқи ишлар вазирлиги ходимлари, ШҲТ Ўзбекистондаги Халқ дипломатиясининг маркази, экспертлар ва ОАВ вакиллари иштирок этди.
Ўзининг кириш сўзида Тошкент давлат шарқшунослик университети ректори Гулчеҳра Рихсиева тақдим этилган монография университет ҳузуридаги Шарқ мамлакатларининг ривожланишини тадқиқ қилиш илмий-таҳлил маркази ҳамда ШҲТнинг Ўзбекистондаги Халқ дипломатияси маркази билан ҳамкорликда чоп этилганини таъкидлаб, миллий сиёсатшунослигимизда Шанхай ҳамкорлиги ташкилотининг фаолиятини чуқур ўрганишга қаратилган илк илмий асарлардан бири эканини таъкидлаб ўтди.
ШҲТ Ўзбекистондаги Халқ дипломатияси маркази директори Қобилжон Собиров мазкур асарнинг чоп этилиши мамлакатимиз жамоатчилиги орасида ШҲТ фаолияти тўғрисидаги маълумотларнинг янада ортиши, шу жумладан, “шанхай руҳи” тамойилларининг мазмун-моҳиятини очиб беришга хизмат қилишини айтди.
Тақризчилар сиёсий фанлар бўйича фан доктори, доцент Н.Абдуллаев ва тарих фанлари бўйича фалсафа доктори, доцент Д.Сафуллаев монография юқори даражада тайёрланганини, муаллифнинг дипломатик фаолиятдаги тажрибаси ва билимлари асарнинг илмий-амалий аҳамиятини янада оширишини таъкидлашди.
Муаллиф Р.И.Нуримбетов асарнинг асосий моҳияти хусусида тўхталиб, ШҲТнинг янги дунё тартиботи шаклланаётган ҳозирги даврдаги ўрни ва роли, унинг Марказий Осиёда хавфсизлик ва барқарорликни таъминлашга ва минтақавий ҳамкорликни кучайтиришга қўшаётган ҳиссаси, тузилманинг яқин ва узоқ келажакда ривожланиш истиқболлари, шунингдек, Ўзбекистоннинг ташкилот доирасидаги фаолиятининг ўзига хос жиҳатлари хусусида сўз юритди.
Сўзга чиққанлар айни пайтда Ўзбекистоннинг ШҲТдаги давом этаётган раислиги муносабати билан ушбу илмий асар тадқиқотчилар, докторантлар ва умуман кенг жамоатчилик учун муайян қизиқиш уйғотишига алоҳида эътибор қаратди.
