Қорақалпоғистонда шу йилнинг 1-2 июль кунлари бўлиб ўтган намойишларда тартиббузарлар Нукус шаҳридаги деҳқон бозори олдида журналист ва блогер Даулетмурад Тажимуратовга Қорақалпоғистоннинг янги раҳбари дея тўн кийдиргани, ҳуқуқ-тартибот идораларига, ходимларига ҳужумлар уюштиришгани, Жўқорғи Кенгес биносига юриш қилганликлари ҳақида маълум қилган эдик.
Намойишчилар, шунингдек, тинч аҳоли вакилларига ҳам тажовуз қилиб, уларнинг ўзлари ва мулкларига зарар етказишган. Шундай ҳамюртларимиздан бири навоийлик Искандар Икромов 1 июль куни тунда янги қурилаётган мактаб учун бетон-плита ортилган юк машинаси билан Нукус шаҳрига кириб келади.
Юкларни тушириб бўлгач, Нукусдаги юк машиналари турадиган жойга келган Искандар Икромовнинг ёнига тартиббузарлар келишади. Ундан юк машинасини олиб қўйиб, намойиш майдонларидан бирида ёқиб юборишади.
Ҳайдовчининг айтишича, юк машинаси билан унинг барча ҳужжатлари ҳам ёниб кетган. Ўша кундан бери Нукусдан уйига кета олмаётган Искандар ака ҳозирда тергов-суриштирув ишлари кетаётганини, зарарни қоплаш чоралари кўрилишини сўрамоқда.
Нукус шаҳрига қилган сафаримиз давомида гувоҳи бўлдикки, намойишларда ёниб кулга айланган автоулов фақат Искандар Икромовники эмас. Бир қанча транспорт воситалари ҳам ёқиб юборилган.
Ёнган техникалар келтирилган майдонда 2 та юк машинаси ва 2 та ҳуқуқ-тартибот ходимларининг “Isuzu” русумидаги автобуслари ҳам бор. Қорақалпоғистон комендатурасининг маълум қилишича, намойишчилар автобусларга ҳам ҳужум қилишиб, ён деразаларини тош отиб синдириб, ичкарига портловчи қўлбола “коктейл”лар отиб, бензин сепишган. Натижада автобус ичидаги ҳарбийлар турли даражадаги куйишдан тан жароҳати олишган.
Ҳозирда тартиббузарликлардан кўрилган зарарлар ҳисобланаётганини айтади масъуллар.
Сардорбек Раҳмонқулов
