Бу ҳақда бугун, Халқлар дўстилиги куни муносабати билан ўтказилган матбуот анжуманида маълум қилинди.
30 июль – 7 август кунлари "Дўстлик" фестивали доирасида юртимизда турли тадбирлар ўтказилиши режалаштирилган. Бу ҳақда Вазирлар Маҳкамаси ҳузуридаги Миллатлараро муносабатлар ва хорижий мамлакатлар билан дўстлик алоқалари қўмитаси раиси Рустам Қурбонов маълум қилди.
Рустам Қурбоновнинг сўзларига кўра, 30 июль – 3 август кунлари мамлакатимизнинг барча ҳудудлари бўйлаб байрам сайиллари, концерт дастурлари ташкил этилиши белгиланган.
4 август куни пойтахтимиздаги "Cinema Palace" кино саройида "Дўстлик" видеороликлар танлови ғолибларини тақдирлаш тадбири ўтказилади.
5 август куни пойтахтимиздаги "International Hotel Tashkent" меҳмонхонасида "Марказий Осиё давлатларида миллатлараро тотувликни таъминлаш" мавзусида халқаро конференция ташкил қилинади.
6 август куни Вазирлар Маҳкамаси ҳузуридаги Миллатлараро муносабатлар ва хорижий мамлакатлар билан дўстлик алоқалари қўмитасида "Халқлар дўстлиги" кўкрак нишони билан вазирлик, идора вакиллари, миллий маданий марказлар, дўстлик жамиятлари ва хорижлик ҳамкорларни тақдирлаш маросими бўлиб ўтади.
Шу куни пойтахтимиздаги Адиблар хиёбонида "Адабий дўстлик- абадий дўстлик" қардош халқлар ёзувчи ва шоирларнинг асарлари кўргазмаси ўтказилади.
Шунингдек "Халқлар дўстлиги" майдонида таниқли эстрада, опера санъати усталари ва Ўзбекистон миллий симфоник оркестри жўрлигида катта гала концерт ҳамда анъанавий костюмлар ва замонавий либослар дефилеси ўтказилиши режалаштирилган.
6-7 август кунлари Қорақалпоғистон Республикаси, Тошкент шаҳри ва вилоятларининг маданият ва истироҳат боғлари, хиёбон ва сайлгоҳларида турли миллат вакиллари иштирокида "Халқлар дўстлиги" концерт дастурлари бўлиб ўтади.
Ойбек Шукуров
