“Ўзгидромет” агентлиги томонидан бугун Тошкентда G3 даражали ва 4 баллга тенг магнит бўронлари бўлиши прогноз қилинган эди. Айни пайтда кузатилаётган ушбу ҳодиса саломатлигимизга салбий таъсир кўрсатмаслиги учун қандай йўл тутиш лозим?
Соғлиқни сақлаш вазирлиги бу борада қуйидаги тавсияларни беради:
- Магнит бўронидан артериал гипертония хасталигига чалинган беморлар кўпроқ азият чекади.
- Бу ҳолат организмда ташқи стрессларга чидамлиликни таъминлайдиган мелатонин моддаси ишлаб чиқарилишининг камайиши билан изоҳланади.
- Қолаверса, магнит бўрони бронхиал астма билан оғриган одамлар саломатлигида ҳам муаммоларни келтириб чиқариши кузатилган.
- Шундай экан, бундай вазиятда, аввало, овқатланиш рационига алоҳида эътибор қаратиш ва кўпроқ суюқлик ичиш лозим.
- Ҳўл мевалар, қолаверса, майиз ва туршак каби калийга бой маҳсулотлар, таркибида C витамини кўп бўлган неъматлардан истеъмол қилиш зарур.
- Магнит бўрони кузатиладиган кунларда спиртли ичимликлардан бутунлай воз кечиш ҳамда ёғли, аччиқ, шўр таомлар истеъмол қилмаслик тавсия этилади. Чунки туз қон босими ошишига сабаб бўлади.
- Тинчлантирувчи хусусиятга эга чойлардан ичиш ҳам мақсадга мувофиқ. Ўз навбатида, мутахассислар ортиқча зўриқтирувчи ишлар ва машғулотлар билан вақтинча шуғулланмасликни маслаҳат беришади.
- Сурункали касалликларга чалинганлар эса ўзлари билан шифокорлар томонидан буюрилган дори-дармонларни олиб юришлари ҳамда қон босимини тез-тез назорат қилиб туришлари лозим.
- Кун давомида бир неча марта душ қабул қилиш ҳам катта фойда беради.
