"Шундай муносабатга жавобан масъулият ҳам бўлиши керак"

ЖАМИЯТ 10.08.2022, 22:59
"Шундай муносабатга жавобан масъулият ҳам бўлиши керак"

Президент Тошкент архитектура-қурилиш институтининг янги биносини бориб кўрганидан сўнг Тошкент шаҳрининг Юнусобод туманидаги Собиробод маҳалласида бўлди.

Қайд этилишича, бу ҳудудда 10 мингга яқин аҳоли яшайди. Маҳаллабай тизим натижасида ижтимоий муҳим масалалар ҳал этилмоқда. Кўп қаватли уйларнинг қиёфаси янгиланган, йўлаклари, коммуникация тармоқлари таъмирлангани айтилади.

"Маҳалла ҳудудидан ўтувчи Юқори Қорақамиш канали атрофи илгари қаровсиз, кўримсиз жой эди. Эндиликда ободонлаштирилиб, сўлим хиёбонга айлантирилди. Пиёдалар учун кўприклар, болалар ўйингоҳи ва спорт майдончалари, велосипед йўлаги, фаввора барпо этилди. Ўриндиқлар, шахмат столи, чархпалак ўрнатилди. Дарахтлар экилиб, чимлар ётқизилди. Канал атрофидаги ҳудудда 300 метр узунликдаги ишкомлар ўрнатилиб, узумлар экилди",-дейилади давлат раҳбари матбуот хизмати берган таърифида.

Хабарга кўра, давлат раҳбари ушбу шароитларни кўздан кечирган. Маҳалла фаоллари, нуронийлар билан суҳбатлашган.

"Ҳозир маҳалла фаоллари катта бир команда бўлди. Раиснинг ёнида ўринбосарлари, ҳоким ёрдамчиси, ёшлар етакчиси, профилактика нозири бор. Бўлгандаям, ойлиги, шароити, ваколати билан бор. Энди шундай муносабатга жавобан масъулият ҳам бўлиши керак. Жамиятдаги ўзгаришларда маҳалла ташаббускор, халққа елкадош бўлиши керак", – деган Мирзиёев.

Маълумотларга кўра, Собиробод маҳалласининг ўсиш нуқтаси - тадбиркорлик. Бу ерда ўнлаб субъектлар – ишлаб чиқариш корхоналари, маиший хизмат шохобчалари, хусусий клиникалар, озиқ-овқат дўконлари фаолият кўрсатмоқда. Бундай ишлар бошқа маҳаллаларда ҳам йўлга қўйилган.

Шарҳлар

Об-ҳаво: Тошкент
Валюта курси
1